(EFE) – Defensor di Pueblo a denuncia cu enfrentamento entre gruponan arma na un zona rural di e municipio Colombiano Arauquita ta impedi cu 150 mucha por bay scol y ta mantene e comunidad aisla, pa loke a exigi pa laga e poblacion civil fuera di e conflicto.
“Esaki ta resulta hopi preocupante pa Defensor di Pueblo pasobra e muchanan menor di edad ta personanan di proteccion special y mester garantisa nan derechonan pa educacion, integridad y bida”, e defensor di pueblo, Carlos Camargo a sigura den un comunicado ayera diahuebs.
Enfrentamentonan pa cual supuestamente a usa armanan no convencional, a wordo reporta for di dianan pasa na e poblacion di Cañas Bravas, un zona cu ta comprometi cu varios vereda di departamento di Arauca, un di e mas golpia pa e conflicto aki y cu tin e cifranan mas halto di violencia na e pais.
Defensor di Pueblo a indica cu comunidadnan campesino y indigena di e region aki ta permanece “den un riesgo inminente” pa accionnan di ELN y di disidencia di FARC, algo cu ta wordo traduci den riesgo di desplasamiento forsa y reclutamento di muchanan.
Camargo, despues di expresa su “preocupacion y total rechaso” pa esaki, a solicita na e gruponan arma “pa laga afo di e conflicto tur e poblacion civil, specialmente muchanan y hobennan, pa mustra gestonan cu lo permiti avansa den dialogo pa construccion di paz cu Gobierno Nacional ta bin promoviendo”.
Ademas a exigi na autoridadnan competente pa haci presencia den teritorio aki y adelanta accionnan siguiendo e recomendacionnan emiti pa Defensor di Pueblo den relacion cu e alertanan cu ya caba ta existi den e zona.
