Ex-presidente Colombiano Juan Manuel Santos mester acudi awe na Conseho Nacional Electoral, tribunal electoral di e pais, pa duna un version liber den e investigacion cu ta andando contra su persona pa presunto financiamento iregular den campaña electoral presidencial di 2014. E placa lo tabata bin di e empresa multinacional Brasileño Odebrecht.

E audiencia ta tuma lugar despues cu e propio Santos a solicita na e tribunal pa scucha su version liber pa por presenta su posicion encuanto e entrada di placa pa su campaña y resolve e preguntanan cu e magistradonan por tin tocante e caso.

E sesion aki tabata programa anteriormente pa dia 4 di october pero riba solicitud di Santos a pospone esaki ta awe, ya cu riba e fecha anterior Santos no tabata na Colombia. Tocante e audiencia CNE a manifesta cu e ex-mandatario no tin inmunidad politico ya cu e actuacion pa cual ta investiga Santos tabata den cuadro di su campaña di reeleccion.

Ta anticipa cu Santos lo mester responde riba e dudanan cu e magistradonan tin encuanto e ultimo revelacionnan di e financiamento di Odebrecht pa su campaña di 2014, den cual el a competi cu e candidato di derecha, di e partido di ex-presidente Uribe, Oscar Ivan Zuluaga. Den e eleccion ey Santos a perde e prome vuelta, pero a gana e di dos cu margen di 500.000 voto.

Odebrecht lo a financia campaña di Santos, loke ley Colombiano ta prohibi. Santos lo a ricibi en total 3.850 miyon peso (US$ 1,2 miyon) via e empresa Gistic Logistic, di Andres Sanmiguel Castaño.

LEAVE A REPLY

Please enter your comment!
Please enter your name here