(EFE) – Gobierno Colombiano a ordena e ciere di pasonan fronteriso terestre y fluvial di e pais for di awe 28 di mei te dialuna 30 di mei cu e fin di garantisa e normalidad di eleccionnan presidencial di mañan, ayera diabierna fuentenan oficial a informa.

A tuma e medida a traves di un decreto den cual a detaya cu e decision ta cuminsa drenta na vigor for di 6or di atardi di awe te 6or di mainta di dialuna na e pasonan fronteriso di Colombia cu Venezuela, Ecuador, Peru y Brazil.

E director di Migracion Colombia, Juan Francisco Espinosa den un comunicado a bisa cu e medida ta busca garantisa “e normalidad total” den e desaroyo di jornada electoral di mañan diadomingo 29 di mei.

E decreto ta aclaria cu e medida di ciere no ta aplica pa e casonan di transito cu por realisa pa motibonan di forsa mayor asina como pa ciudadanonan Colombiano residente na Venezuela, cu tin nan cedula inscribi na e consulado, cu ta funciona na teritorio Colombiano, na zona di frontera.

E puntonan di control migratorio cu ta bay wordo afecta na frontera cu Venezuela ta esun di departamento di Guajira, e migratorio na Paraguachon na municipio Maicao, na Norte di Santander, e brug internacional Simon Bolivar na Villa del Rosario, e brug internacional Francisco de Paula Santander na sector El Escobal y esun ubica na e Puerto Santander.

Na departamento di Arauca, e brug internacional Jose Antonio Paez, na frontera cu Brazil lo cera e punto di control di Leticia.

Igualmente na frontera cu Peru esunnan afecta ta e departamento di Amazonas, punto migratorio fluvial di Leticia na Putumayo y Puerto Leguizamo.

Di ultimo, na frontera di Colombia cu Ecuador lo cera na Putumayo e Puerto Leguizamo y San Miguel.

Mientras tanto na Nariño, e puntonan na brug internacional Rumichaca na Ipiales y esun ubica na Chiles-Tufiño.

Mañan lo tuma luga e prome buelta di eleccionnan presidencial, unda cu Gustavo Petro, di coalicion iskierda Pacto Historico, ta esun cu tin e intencion di voto mayor na tur encuestanan.

LEAVE A REPLY

Please enter your comment!
Please enter your name here