(AFP) – Castiga pa un secura cu tin varios hidroelectrico cerca di nivelnan critico, dialuna ultimo Colombia a anuncia cu ta stop di exporta energia pa Ecuador, na unda ta bay tin “racionamento.”
“For di Semana Santa nos a limita exportacion di energia pa Ecuador. Na e momentonan aki nos no ta exporta energia mas,” minister di Mina y Energia, Andres Camacho a bisa na medionan local.
Di su parti, minister di Energia y Mina di Ecuador, den un comunicado a anticipa cu “ta bay tin racionamento temporal” pa situacionnan “sin precedente na nivel nacional y regional.”
Memey di un secura prolonga asocia cu fenomeno El Niño, Colombia, cu ta depende di generacion hidroelectrico, a adopta “tur medida” pa evita suspende servicio di coriente.
“Nos tin tur planta termico al maximo,” Camacho a destaca, agregando cu e pais tambe ta acudi na fuentenan “renovabel” y na “planta hidraulico” pa satisface e demanda di 50 miyon habitante.
Damnan di e pais actualmente ta den un 29.8% di nan capacidad, segun operador di sistema, XM. Cerca di nivel critico di 27%.
Na maart XM a registra e maximo exportacion di 129 gigabyte/ora pa Ecuador, cu a aumenta su importacion di energia na final di 2023, tambe pa secura asocia cu El Niño.
Den algun zona di Quito tabatin corte di coriente dialuna ultimo, segun compania di energia local e interupcion di coriente ta debi na “mantencion emergente,” te ainda Gobierno no a anuncia e orarionan den cual e servicio ta bay ser interumpi.
“Loke nos a biba den ultimo siman no ta solamente fenomeno El Niño sino tambe un ola di calor,” e minister Camacho a declara.
Segun e mandatario e pronostico meteorologico ta indica cu yobidanan ta bay “yega pronto,” aunke racionamento di coriente ta den posibilidadnan.”
Gobierno tambe ta apunta na calentamento global como un di e causanan di e crisis.
Escasez di yobida y temperatura halto a hiba Bogota na un racionamento di awa pa e capital di 10 miyon habitante.
Pero e medida, cu ta implica cortenan programa den servicio pa subi e nivel di e damnan cu ta abastece e ciudad, no a trece e solucion cu nan tabata spera.
Dialuna ultimo, alcalde Carlos Galan, a anuncia multa na esnan cu ta haci uso excesivo di awa.
“Nos ta bay cuminsa impone multa pa accionnan iresponsabel cu lo hiba na gastamento di awa innecesario,” Galan a bisa den un conferencia di prensa.
E multa ta bay ta for di 700.000 hasta 1.2 miyon peso Colombiano (di 180 pa 310 dollar).
Laba auto, brommer o bais riba caminda publico ta bay ta un di e accion cu castigo y alcalde a sigura cu polis ta bay recore e ciudad pa haya esnan cu lo por comete e accion aki.
For di momento emergencia a cuminsa, barionan di Bogota no tin awa durante 24 ora cada 10 dia y segun e beurt cu ta coresponde na cada un.
