E compania petrolero estatal Colombiano Ecopetrol a denuncia un atake nobo riba e oleoducto Caño Limón-Coveñas den departamento norte de Santander, cu ta duna acceso na costa Atlantico na crudo Colombiano pa exportacion.
“Nos ta registra un atake nobo riba e oleoducto Caño Limón-Coveñas cerca di vereda Cubugón, caserío La Colmena, municipio di Toledo. Nos ta pidi comunidad di aleha y no cende fogon, ni palo cu ta pega candela ni nada cu por produci chispa,“e empresa petrolero a divulga a traves di su cuenta di Twitter.
Desde 9 d januari ultimo Ehercito di Liberacion Nacional (ELN) a reactiva un ofensivo terorista contra e oleoducto despues cu e cese al fuego bilateral pacta cu gobierno di Juan Manuel Santos a termina. Mescos den pasado e oleoducto cu ta di gran importancia pa e empresa y economia Colombiano, ta blanco di atake di e grupo guerrillero.
Segun Ecopetrol, den e aña aki a registra mas di 10 atake riba e oleoducto aki.
Banda di e atakenan sistematico riba e oleoducto tin tambe e atakenan riba e posnan di petroleo den e zona rural di municipio di Aguazul, Casanare, zona tradicionalmente influencia pa ELN.
E atake di siman pasa diahuebs a sucede despues cu un grupo di persona arma a intimida e personal di siguridad y a activa carga explosivo den e posnan Liria YD2 y YD36 di e Campo Cupiagua-Recetor.
Despues di e atakenan, Ecopetrol a ordena e ciere di e posnan mientras cu forsa arma publico a presenta den e zona pa controla e situacion.
