A3 26feb hoverboard (np).jpeg

Ainda na Aruba por core cu Hoverboard na diferente sitio publico, mientras cu na Merca el a wordo declara como insigur y diferente bendedo a stop di importa y bende esakinan.

 

Aruba 
Aki na Aruba compania Kooyman a considera e producto un exito, como cu nan a haci pedido di un cargamento cual a wordo bendi masha lihe. Bon Dia Aruba a tuma contacto cu nan atrobe pa mira si nan ta bay tin mas cargamento di Hoverboard, pero a compronde cu esaki lo no ta e caso. Segun nos tin entendi, ta cu tambe a tuma nota di e luz negativo cu tin riba e producto, y cu por ehempel no por ni subi avion cun’e y tampoco core na diferente parti, primordialmente pa motibo di siguridad. Teniendo esakinan na cuenta nan no ta pensa e ta bon idea pa nan importa mas, a pesar cu el a bende bon. Anteriormente nos a publica un articulo cu ta bisa cu aki na Aruba tampoco por core riba caminda. Pregunta cu ta keda pa hopi cu ta fanatico ta si berdad ta necesario pa bin cu un prohibicion pa e Hoverboard, otronan ta compara esaki cu skateboard etc. cu si ta wordo uza tur caminda. Di remarca ta si, cu e ta un producto cu chikito te grandi ta gusta.

Baba’s Electronic a kende Bon Dia Aruba a entrevista anteriormente a bisa cu nan ta pendiente di un cargamento nobo cu mester drenta. Prome cargamento cu nan tabatin tabata consisti di 150 pida, cual a wordo bendi masha lihe. P’esey nan ta bay bin cu mas. A puntra si nan ta tene cuenta cu desaroyo na Merca cu ta considera e Hoverboard como insigur y no ta certifica. Segun Baba’s, nan ta pidi solamente marcanan LG cu Samsung cual ta certifica y no a haya keho of problema cu niun di nan. Berdad aworaki e ta duda poco como comerciante si ta cumpra atrobe, como cu varios parti na Merca no ta duna garantia mas riba nan. “Si nan no bende nos cu garantia, ami no por bende na Aruba cu garantia tampoco”. A pesar di esaki nan ta pendiente pa nan ‘supplier’ keda cla cu e miho opcion pa importa esaki.

Palm Beach Plaza mall a indica cu no ta permiti pa core Hoverboard parti paden.

 

Acera
Locual cu por a compronde pa e uzo di Hoverboard como parti di trafico ta, cu e ta prohibi pa core riba caminda cun’e, e ora claro ta puntra si riba acera si por. Splicacion cu nos a ricibi for di polis di trafico ta cu e mester ta move pa medio di motor, y paga pa belasting entre otro prome cu e por ta riba caminda, claro e mester ta den nos ley hinca tambe. Awo riba acera ta conta, cu no ta move pa medio di motor. Hoverboard ta funciona a base di bateria cual ta pone den otro categoria, cual ta haci e situacion dificil. Polis a bisa mientrastanto por core cun’e riba acera, pero no ta descarta cu pronto por bin algo cu ta prohibi esaki, pues e ora mester cumpli cun’e tambe.

 

Djis 4 luna pasa, e coy hunga mas ‘hot’ tabata Hoverboard, disponibel riba casi tur website y un cantidad di tiendanan. Mas o menos 400 mil Hoverboard a wordo exporta for di China su capital di electronico Shenzhen na October so, pa satisface e crecemento di fanaticonan rond mundo. Awendia, nan ta scars y inutil.

Gobierno Federal di Merca a bisa siman pasa cu ningun Hoverboard ta cualifica segun nan standard di siguridad, y bendedonan grandi manera Amazon y Toys R’ US a stop di carga esakinan completamente. Bo no por transporta nan riba diferente avion of transportacion publico na New York y cantidad di otro ciudad. Core nan den publico ta prohibi na Britania, riba camindanan na New York y trottoir, parkenan di Disney rond mundo, y cantidad di tereno di scol. Di prome di december solamente, tabatin mas cu 50 candela na Merca, relata cu Hoverboard, e gobierno Mericano a bisa, y inmigracion ta trahando overtime pa tene nan pafo di e pais. Control di frontera na Houston a tuma den posesion mas cu 3500 Hoverboard cu bateria sospechoso, yegando na suma di mas o menos 1.8 miyon dollar den mercancia dia 22 di februari. Den e control di mas grandi, agentenan di Chicago a tuma posesion di mas di 43 mil Hoverboard na januari, algun di nan cu tin certificacion falso di UL ( e compania priva cu ta actua como un medida di mantencion di standard pa tur producto electronico na Merca).

E industria di Hoverboard a wordo crea riba e lomba di China su ecosistema di manufactura productonan, ambos ultra eficiente y ultra fragmenta.  E cualidadnan a prueba di ta un bendicion y maldicion pa e pais. E pais su secuencia di proceso cu ta encera produccion y distribucion di un producto cual ta denso, a yuda hiba e producto for algo riba papel te na mercado masal den algun luna. Pero e pura pa satisface pedidonan y falta di standard di siguridad a crea un producto cu por ta hopi peligroso, cual a crea panico masal y cantidad di prohibicion.

Pues mientras cu nan por tabata “e regalo” pa Pasco 2015, casi ningun hende ta papiando di nan mas segun Google Trends ta mustra.

LEAVE A REPLY

Please enter your comment!
Please enter your name here