Ayera mainta, minister di Turismo y Salud Publico, Dangui Oduber a duna un conferencia di prensa pa informa tocante e comision Airlift, cu ta consisti di e ministerio di Turismo, AAA, ATA y AHATA. E comision tin varios tarea, por ehemplo, explora diferente posibilidad di destinacionnan nobo pa Aruba.

Oduber a expresa cu teniendo na cuenta loke Covid-19 a causa pa Aruba, nan ta bin haci diferente reunion pa wak kico ta e posibilidad nobo cu por tin pa crea rutanan nobo pa Aruba. Den e presentacion aki el a splica cu nan a haya un update di kico ta e capacidad di asiento pa e siguiente winter e aña aki, pa aña 2022 y e proyeccionnan di asiento disponibel.

El a bisa cu Aruba semper ta conoci como un di e paisnan cu tin e miho conectividad den Caribe. Na e momentonan aki tin 25 aerolinea cu ta bulando na e destinacion di Aruba for di 28 destinacion, loke ta conduci na 39 servicio, algo cu e ta sigura cu ta hopi excepcional pa Aruba.

Di e forma aki nan lo sigui explora con pa sigui amplia rutanan, destinacion y servicionan nobo.

Ademas diahuebs ultimo nan tambe a ricibi informacion di e proyeccionnan pa e proximo winter y pa aña 2022. Pa esaki, Oduber a agrega cu tur e proyeccionnan ta indica cu Aruba lo surpasa pa aña 2019 e capacidad di asiento; esaki ta nifica e cantidad di asiento cu aerolineanan ta pone disponibel pa Aruba.

Pa e proximo aña nan ta proyecta 1.718.176 asiento, un cifra mas halto di loke aña 2019 tabatin y tambe ta esun di mas halto den historia di pais Aruba, cu pa prome biaha nan ta haci e proyeccion di asientonan disponibel asina halto.

E destinacionnan cu lo mira e aumento mas grandi for di e capacidad di asiento cu aerolineanan ta disponibel, nan ta mira cu e mercado Americano lo tin un aña record y cu pa prome biaha Aruba lo tin un 1.196.924 asiento disponibel. Un otro mercado cu tambe ta registra un porcentahe halto ta e mercado Europeo cu 219.319 asiento disponibel. Ttur e cifranan aki ta wordo compara cu aña 2019, na unda cu segun Oduber, tabata un di e miho añanan pa turismo.

Den siguiente kwartaal di e aña aki, Oduber a declara cu lo mira con turismo lo bay crece, si ta mira e capacidad di asiento den di cuater kwartaal compara cu e di tres di aña 2021, na unda nan a mira cu mercado Europeo ta bay conoce un aumento di 8% di asiento disponibel. Tambe lo tin vuelonan adicional di e aerolinea KLM.

Tambe vuelonan for di Latino America lo conoce un aumento di 15%, igualmente cu Canada, Merca, Caribe Hulandes y otro regionnan.

Di loke ta trata e Departing Passengers, tin dos scenario cu AAA a informa. Scenario conservativo y scenario cautelosamente optimista na unda cu nan ta mira cu pasahero cu ta sali for di Aruba den comparacion cu aña 2019 ta ilustra cu aña 2022 lo ta un hopi bon aña pa turismo di Aruba.

2020 cu tabata e aña di pandemia, nan a logra negocia cu diferente aerolinea pa asina nan por presenta e informacion aki pa comunidad, manera Oduber a expresa. Pa e winter aki lo tin 47 vuelo semanal non-stop for di New York, 23 vuelo semanal non-stop for di Florida. E mercado di New York ta conta como e 40% di e mercado di turismo cu ta bin for di Merca y pa december nan tin calcula e registro di 600 vuelo pa Aruba.

Manera a keda conoci siman pasa for di CEO di ATA, Ronella Croes tambe lo tin un ruta nobo di e aerolinea Frontier for di Miami e dia 20 di november y 18 di december lo tin un vuelo inaugural di Delta Airlines for di Boston.

E distribucion di Mercado Americano tin un 92% di e trafico cu Aruba ta ricibi, manera Oduber a confirma caba cu e ta e miho mercado cu ta duna un miho resultado conforme e turistanan cu tin un entrada anual di 150.000 dollar.

LEAVE A REPLY

Please enter your comment!
Please enter your name here