Awe na Parlamento di Aruba ta bay trata e Landsverordening beperking tabaksproducten, un ley existente implementa na 2017, y riba cual aworaki a bin algun ahustacion cu ta regarda prohibicion di humamento den areanan publico.

Pa esaki, minister di Turismo y Salud Publico, Dangui Oduber a señala den su conferencia di prensa di ayera mainta cu di parti di e departamento di Salud Publico ora el a wordo trata y aproba den parlamento no tabata un ley completo na unda cu mester haci algun cambio.

El a splica cu ta bin un prohibicion di humamento den areanan publico; e edad pa cumpra sigaria ta bay aumenta di 18 pa 21 aña; ta bay prohibi bendemento di sigarianan los; y tambe el a indica cu nan lo duna proteccion na menor di edad, cu si por ehemplo, un mayor wordo gara si e ta huma den compania di un menor di edad, lo haya un multa pa esaki.

Si e ley aki keda aproba awe na parlamento, e lo drenta na vigor proximamente. Oduber ta considera cu e ley aki ta hopi importante den cuadro di Plan Nacional di Prevencion cu a wordo lansa pa Gobierno di Aruba na luna di maart di 2020, pero cu a keda posponi pa via di pandemia di Covid-19.

Igualmente el a bisa cu nan ta enfoca riba prevencion di salud cu campañanan di conscientisacion. Ademas nan kier bin cu un clinica di Obesidad na hospital, caminda cu proximamente lo cuminsa como un proyecto piloto pa motibo cu “nos tin cu inverti den prevencion pa nos tin un comunidad mas saludabel, baha e mortalidad y percura pa nos tin un fondo di AZV cu ta sostenibel. Pasobra cu tur e proyeccion cu tin aworaki ta dificilmente cu bo por mantene AZV sostenibel, mirando cu e comunidad no ta esun di mas saludabel”, el a sigura.

LEAVE A REPLY

Please enter your comment!
Please enter your name here