Comision ehecutivo di Union Europeo a duna luz berde ayera na e vacuna pa Covid-19 di Moderna Inc., dunando e bloc di 27 nacion un segundo vacuna pa usa den e bataya desespera pa domina e coronavirus sutando den e continente.
Comision Europeo a duna autorisacion di marketing condicional pa e vacuna. E decision a yega entre un tasa halto di infeccion den varios pais di UE y critica fuerte riba e velocidad slow di vacunacion na e region di alrededor di 450 miyon persona.
Presidente di Comision Europeo, Ursula von der Leyen a bisa den un declaracion: “Nos ta dunando mas vacuna pa Covid-19 pa Europeonan. Cu e vacuna di Moderna, e di dos autorisa na UE, nos lo tin otro 160 miyon dosis. Y mas vacuna ta na caminda.”
EMA a recomenda e autorisacion condicional despues di un reunion ayera.
“E vacuna aki ta provee nos cu otro herment pa sobrepasa e emergencia actual”, segun director ehecutivo di EMA, Emer Cooke.
EMA luna pasa a otorga e mesun aprobacion condicional na un vacuna pa coronavirus traha pa fabricante di medicina Mericano, Pfizer y e Aleman, BioNTech. Ambos vacuna ta rekeri pa hende tuma dos dosis.
UE a bestel 80 miyon dosis di e vacuna di Moderna cu opcion pa otro 80 miyon. E bloc tambe a compromete na cumpra 300 miyon dosis di e vacuna Pfizer-BioNTech.
Resultadonan inicial di estudionan grandi, ainda sin termina, ta mustra cu tanto e vacuna di Moderna como esun di Pfizer-BioNTech ta mustra safe y protectivo, maske esun di Moderna ta mas facil di maneha ya cu e no mester ser warda den temperaturanan hopi abao.
E agencia di UE a duna luz berde pa usa e vacuna di Moderna den hende mayor di 18 aña di edad. A bisa cu e efectonan ‘usualmente tabata leve of modera ya mehora dentro di algun dia di vacunacion’.
E efectonan secundario mas comun ta ‘dolor y hinchamento unda a pone e hangua, cansancio, chills, kentura, lymph nodes hincha of doloroso bao brasa, dolor di cabez, dolor di musculo, nausea y sacamento’, EMA a bisa.
