Na mita di luna di december ultimo, DIMAS a anuncia un maneho nobo riba otorgamento y prolongacion di permiso pa inversionistanan, trahadonan y profesionalnan di afo cu ta bin traha of nan ta trahando caba na Aruba.

PR di DIMAS, Marilyn Wout a declara na Bon Dia Aruba cu nan tin contacto cu diferente instancia entre nan departamento di Impuesto (DIMP), Banco di Seguro Social (SVB), pero uno clave ta departamento di Progreso Laboral (DPL) pa loke ta trata e cuponan di trabao cu tin disponibel na Aruba. DIMAS ta depende completamente ariba DPL, si e trahado migrante ta bay ricibi un documento positivo pa nan por sigui tramita e permiso.

Cobertura AZV

Tambe e ta compronde cu tin persona cu a keda vulnerabel, sin AZV, ya cu nan permiso a caduca. Pero Wout a splica cu den e maneho conhuntamente cu AZV a delinea tambe cu personanan cu ta depende di un permiso pa tin cobertura di AZV, mester entrega un peticion di renobacion di permiso alomenos tres luna prome cu e permiso ta caduca. Te hasta un luna prome cu e permiso ta caduca ainda e persona ta na tempo. Pero si e persona ta warda te ultimo momento e ta cay bao e responsabilidad di e persona. Mas cu e permiso di e persona a caduca y tambe nan AZV hunto cune, el a laga sa cu AZV ta keda cubri e gasto di e persona cu a entrega nan peticion di permiso na tempo.

DPL positivo

E persona no tabatin un DPL na cuminsamento di e corona virus crisis, toch DIMAS a tuma nan peticion wardando riba nan respuesta. Pero dado momento nan a dicidi di no sigui cu esaki, ya cu a bira un avalancha di solicitud cu no tabatin e documento clave di DPL. Eynan DIMAS a cuminsa informa cu e persona mester tin un peticion completo incluyendo e documento di DPL pa asina nan por trata nan peticion di permiso.

Ya cu si e persona tin un DPL positivo ta un informacion cu DIMAS ta depende di nan. “Na e momento aki e hendenan sa cu nan mester e documento ey di DPL,” segun Wout. El a laga sa cu nan ta trahando cu DPL pa logra esaki. Esaki tin di haci cu e cantidad di peticion di permiso cu a wordo haci via online, y cu ainda ta pega, sin haya contesta prome cu nan permiso a caduca.

Trahadonan di importancia vital

Den e caso di e trahadonan cu no tabatin mester di un DPL positivo, entre nan e trahadonan di servicio domestico of esunnan destina pa cuida nos grandi y tambe trahadonan cu ta cuida mucha menor di edad, e maneho nobo ta referi na nan tambe.

E trahadonan ta cay den e categoria di esnan cu ta wordo considera di importancia vital. “Esaki ta personanan cu eigenlijk ta di importancia vital y cu no lo bay tin un restriccion ariba nan,” segun PR di DIMAS. E trahadonan aki ta wordo considera personal di confiansa cu ta wordo hinca den bo cas pa cuida bo sernan keri.

Retraso

Den caso cu un di e organisacion manera DPL por tin un retraso, DIMAS tambe ta cay atras pa nan por sigui cu e proceso di solicitud di e persona. El a bisa cu eynan tambe tabatin algun retraso cu nan ta bezig pa resolve nan.

Manera a keda anuncia caba tin un grupo di persona cu ta bay haya e preferencia riba mercado laboral, nan ta:

1.Tur persona cu ta ser considera Arubiano.

2.Tur persona cu ta ser considera como Arubiano “nobo” dor cu nan a por naturalisa.

3.Tur persona cu tin admision segun ley na Aruba, por ehempel dor di nan tipo di trabou , nan nacionalidad of nan estado civil.

El a laga sa cu pa loke ta e prome permiso di trabao ta bay pone un stop. Pero tin excepcion den e caso di migrante cu a base di nan profesionalismo ta bin realisa un trabao na Aruba, caminda den nos mercado laboral no tin persona pa haci’e.

Nan tin un lista largo cu ta publica riba DIMAS su website, entre nan relaciona cu personanan den e sector medico. “Si no tin personanan akinan local lo por busca esaki nan di afo,” el a bisa.

4. Tur persona cu tin un firma liber.

5.Hulandesnan en general.

6. Arubiano cu kier regresa pa contribui na Aruba su economia.