(Infobae)— Legisladornan ta presenta e conclusion di rapport investigative con Gobierno Brazilero a maneha e pandemia COVID-19

E informe final di e Comision Parlamentario di Investigacion, CPI cu ta encarga pa mira con Gobierno di Brazil a maneha e pandemia di COVID-19 ta entrega peticion pa investiga Presidente Jair Bolsonaro di crimen contra humanidad y genocida di indigenanan entre otro.

E rapport lo keda presenta mayan Diamars na Senado y despues di votacion, lo bay pa Ministerio Publico cu mester dicidi si ta bay persigui e accionnan legal contra Bolsonaro.

Den caso di e Presidente, unicamente e Oficina di Fiscal General, PGR, tin e autoridad pa tuma paso legal contra e prome mandatario di e pais.

CPI a formula un total di 11 delito contra Presidente Bolsonaro. Nan ta: crimen di epidemia cu resultado di morto; violacion di medidanan di salud pa preveni contagio; uso ilegal di fondonan publico; incitacion na crimen; falsificacion di documentonan priva; curanderismo, esta promocion di medicina falso; no actua na tempo; genocida contra e pueblonan indigena; crimen contra humanidad; crimen di responsabilidad; y homicidio pa motibo di a faya den e lucha contra e pandemia.

Renan Calheiros, Senador di e Movimiento Democratico Brazilero ta e persona encarga cu CPI y e lo entrega e dato y analisis cu a haci durante e ultimo seis lunanan. E conclusionnan ta unanime paloke ta trata e actuacion negligente di Bolsonaro. Ademas di e Presidente, e comision tambe ta bay pidi pa persigui como 30 otro persona pa diverso delito den henter e odisea di e pandemia COVID-19 na Brazil. E acusacionnan ta varia di malversacion te na ladronicia.

Brazil ta sigui Merca pa e pais cu mas morto pa motibo di COVID-19.

No ta prome biaha cu a acusa Bolsonaro di genocida contra pueblonan indigena di Brazil. Es mas, na Augustus, e organisacion principal di pueblonan indigena di Brazil a entrega un demanda pa genocida contra Presidente di e pais, basa riba informacion cu 1162 persona di 163 comunidad indigena a muri pa motibo di actonan di Gobierno. Den e documento ta argumenta cu Bolsonaro a permiti cu ta kibra areglonan ambiental cu asina a produci e genocida, ademas cu a kita tur servicio publico di proteccion social. Di e forma aki a permiti deforestacion ilegal, destruccion di pueblonan y incendionan intencional.

E siman aki lo tin un marcha den tur e ciudadnan Brazilero pa pidi pa baha Bolsonaro. E marchanan aki, na Rio de Janeiro, Salvador, Sao Paulo y Brasilia a keda organisa pa e ‘Campaña Nacional Afo Bolsonaro’ cu ta sosteni pa partidonan izquierdista, sindicatonan centrista.

LEAVE A REPLY

Please enter your comment!
Please enter your name here