Den un articulo den nos edicion di 24 di november a aparece e noticia (di agencia Argus Media) cu Aruba lo tabatin un contrato cu e compania Emqore, cu lo ta un compania cu ta asesora empresanan cu ta den problema y ta en busca di financista nobo. E relacion ey lo a yega na un final luna pasa, segun un “funcionario senior di gobierno di Aruba” lo a bisa Argus.
Redaccion di Bon Dia Aruba a tuma contacto cu nos Promer Minister Evelyn Wever-Croes, pa averigua si e como responsable pa e sector di Energia, por ta na altura di e contrato aki. Nos reportero a haya e contesta cu e mandatario “No conoce e compania ey. Mi nunca a reuni cu nan. Gobierno no tin contract cu nan. E unico cu por tabatin contact cu nan ta RdA.” Y su referencia seguidamente pa check cu RdA NV.
Investigacion di redaccion di Bon Dia Aruba a duna cu en berdad Emqore OU ta un compania estableci na Tallin, Raekoja Plats 13 . Segun e website di D&B Hoovers, EMQORE OU tin un 1 empleado en total na tur su localidadnan y ta genera US$64.197 ,- na benta. Riba otro website di registro publico di Estonia por a haya sa cu na 2019 e compania tabatin un ‘turnover’ di 7.866,80 euro y na 2020 te awor a declara un benta di 7.633,53 euro. Segun e website aki, e compania no tin empleado.
Redaccion di Bon dia Aruba a tuma contacto cu gerencia di RdA NV tocante e topico aki, pero te na ciere di edicion nos no a haya respuesta riba nos preguntanan.
Nota di redaccion:
Ta parce nos sumamente straño cu sea gobierno, sea Refineria di Aruba Nv ta cera contrato cu un compania cu dificilmente por yuda den un busqueda di partner den petroleo. Pa esey lo mester busca den e centronan di negoshi di petroleo, cu por ta New York, Houston, Londres o Saudi Arabia, y no na un lugar manera Estonia, unda asina leu cu nos sa no por tin mucho experticio di petroleo. Dificil pa comprende con ehecutivonan di RdA NV ta busca partner nobo di e manera aki, gastando recurso limita riba e tipo di iniciativa aki. Ta di spera cu ainda RdA NV por duna un clarificacion di un que otro.
