Compania nobo ta reestablece ruta aereo Aruba-Guajira

Un biaha mas a establece transporte aereo entre Aruba y Guajira. Un compania aereo nobo y chikito, pero cu un vision empresarial grandi, a cuminsa bula entre Aruba y Riohacha. Dos destino cu pa añanan a mantene un relacion familiar y comercial ancestral.

Ta trata di e compania Jet Charters, cu a cuminsa opera e ruta aki cu un avion tipo Piper PA-31 cu capacidad pa cinco pasahero. E dos persona tras di e compania aki ta Fernando Osorio, kende ta director di operacion di vuelo di Jet Charters, y Claudio Stamper, kende ta accountable manager di e compania aki. Stamper a bisa cu nan a bin cu e compania aereo aki ‘pa habri porta’ no solamente na Riohacha, sino nan kier bula otro regionnan of ciudadnan cu a keda neglisha pa e companianan aereo. Nan tin pensa di bin cu otro avion pa atende cu e demanda di pasaheronan aki.

Osorio a declara na Bon Dia Aruba cu nan ta un compania nobo cu a haya su certificacion di operacion aereo dia 31 di october ultimo. Nan tin tur permiso cla, tanto di Aeronautica Civil di Aruba y esun di Colombia, pa opera como un aerolinea comercial di pasahero. El a bisa cu tur nan permiso a wordo tramita, y nan no tin inconveniente cu niun di e autoridad aeronautica di Aruba y Colombia. “Actualmente nan a pone atencion mas riba mercado corporativo di agencianan di seguro, oficina di abogado y banco cu ta desea bin Aruba y Corsou.

Sinembargo, e vision di e compania aki ta esun di establece un empresa comercial di vuelonan regular di operacion di pasahero. T’asina cu nan a cuminsa tres siman pasa, bulando caba dos biaha pa siman entre Aruba-Riohacha round trip. Nan ta bula dialuna y diabierna atardi, saliendo 2’or di atardi for di aeropuerto Reina Beatrix y yegando na aeropuerto Almirante Padilla banda di 3’or, ora di Aruba. Nan ta sali for di Riohacha banda di 3:30 atardi ora di Aruba y yegando banda di 5’or atardi. E ta alrededor di 50 minuut di vuelo.

Director di operacion di vuelo di Jet Charters a laga sa cu otro companianan ta opera pa Colombia. Pero nan kier bin cu un sorto di servicio diferente, mas personal. Nan ta kier ofrece un servicio ‘excelente’ pa nan cliente. Un punto importante tin di haber cu aspecto di siguridad. “Cualkier operacion cu nos ta desaroya ta wordo hinca den e standard mas halto di siguridad,” el a bisa.

Otro aspecto importante tin di haber cu atencion pa nan cliente. Esaki kier men cu e compania ta cumpli cu nan clientenan, cumpliendo cu nan fecha y orario di vuelo cabalmente. Ademas nan ta ofrece un servicio VIP na nan pasaheronan, cu ta inclui champagne abordo pa esun cu ta desea y tambe snack. Igualmente nan ta ofrece e pasaheronan sinti nan mes confortabel abordo di e avion aki. Mirando cu e avion aki ta uno di poco pasahero, nan clientenan no mester perde tres ora wardando den e aeropuerto, y e ta un vuelo directo pa esun cu ta desea bay Riohacha of Caribe Colombiano. Practicamente nan mester ta den aeropuerto mey ora prome cu e vuelo ta lanta.

E nave aereo aki tin e caracteristica di un avion ehecutivo, caminda nan ta sinti cu nan ta bulando den un avion grandi den clase ehecutivo. E avion tin airco, entretenimento abordo, musica, refresco, etc… Pasaheronan por bula cu un ekipahe di 15 kilo. Si e ekipahe ta pesa un kilo of dos kilo mas, nan ta cobra algo extra riba cada kilo, y no riba e balor di otro maleta.

E ta un experiencia di servicio –segun Osorio- cu nan ta bin ofrece bastante diferente na otro companianan comercial. E compania ta consciente cu un ruta cu a keda bandona pa basta tempo te exigi di nan un esfuerso financiero grandi. Pero nan ta sigur cu e compania aki lo conta cu e sosten di e pueblo di Aruba y tambe di e Colombianonan, muy specialmente esunnan cu tin famia den e pais aki di region Caribe. E pasaheronan cu a haci uzo di nan servicio a keda masha contento cu nan servicio y nan a duna un bon feedback, el a bisa.

 

 

 

You May Also Like

reef care 1.jpg

Mas boluntario pa Aruba Reef Care

Net na e clausura di e version 22 di e accion di limpiesa di ...

Reforma fiscal lo trece eventualmente un impuesto na estilo di BTW

Minister di financia, asuntonan economico y cultura ta indica cu den proceso pa desaroya ...

‘Mey ora ta maximo pa pashent warda’

Presidente di HAVA: Den un edicion anterior, Bon Dia Aruba a trece dilanti e ...

IMG_8468.JPG

Razzia na KIA: A haya celular y mapa

Segun confirmacion di Director di KIA Sr. Rocco Tjon, tabata tin un razzia na ...

NG Yakari.jpg

Aruba, Aruba, Aruba, ta na unda nos ta bay?

Mi hendenan, bon siman! Falta poco pa scol cera pues ami ta riba un ...

Debate turbulente no a aclaria futuro di minister Paul Croes

  Ayera a tuma luga e reunion publico tocante caso di minister Paul Croes ...