E empresa Brasileño Braskem a finalisa un contract pa cumpra gasolin virgen liviano y gasolin natural di e empresa petrolero estatal Venezolano, Pdvsa, cu ta caduca e luna aki, asina e empresa petrokimico a bisa diahuebs ultimo na prensa.
E empresa cu sede na Sao Paulo a nenga di comenta e motibo pa cual el a pone fin na e contract di suministro a largo plaso, pero a bisa cu e contract tabata representa menos di 0,1% di su consumo anual.
“Braskem ta continua cumprando regularmente materia prima, manteniendo su operacion industrial na Brasil,” a bisa den comunicado na Reuters.
Pdvsa no a responde riba un solicitud pa comentario di e agencia noticiero.
E empresa Venezolano di energia tabata luchando pa mantene su relacionnan comercial memey di e dificultadnan di pago na e proveedornan y pa e sancionnan, imponi riba e compania y riba un di su ehecutivonan halto, pa Estadonan Uni.
Un fuente di Braskem y un fuente di Pdvsa a bisa cu e sancionnan Mericano contra Pdvsa, cu ta trata di blokeo financiamento di e gobierno di presidente Nicolás Maduro, a hunga un papel den e decision.
Braskem no a considera e contract significativo den termino di su volumen, segun e fuente di e empresa Brasileño, cu no tabata autorisa pa papia publicamente y a solicita anonimato. Pa Pdvsa, e perdida ta significativo pasobra e ta un di su poco productonan petrolero pa exporta, memey di caida di produccion.
E suministro di Pdvsa di nafta virgen liviano y gasolin natural na Braskem a cay durante e prome mita di e aña aki te 7.600 bari pa dia (bpd) na juni, di como 20.000 BPD na januari, segun datonan interno di Pdvsa.
A pesar cu e sancionnan Mericano ta exclui e mayor parti di comercio entre Pdvsa, su unidad di refinacion Citgo Petroleum, y su clientenan, banconan a mustra cierto reserva pa extende e cartanan di credito necesario pa algun envio di petroleo.
E comerciantenan ta tratando di reduci nan exposicion crediticio na Venezuela exigiendo pago adelanta ora ta bende carga na Pdvsa. Como resultado, e compania petrolero ta obliga di renegocia algun di su acuerdonan comercial a largo plaso pa cambia e condicionnan di pago.
E pais tambe ta tratando di aleha di un comercio internacional altamente centra riba dollar Mericano, presidente Maduro a bisa recientemente, y na su lugar lo trata di ricibi rupia di India, rublo di Rusia y yuan di China.
Ministerio di Petroleo di Venezuela a publica siman pasa e prijs di su canasta di petroleo na yuan pa prome biaha.
