E fin di siman aki Aruba a conoce resultadonan tan spera pa locual ta eleccion 2017. Manera conoci, Departamento di Legislacion y Asuntonan Huridico a pone e ley seco vigente na diahuebs 21 september pa 6’or di atardi te diasabra 23 di september 6’or di mainta. Tur cos a bay practicamente trankilo den fin di siman aki, fuera di algun incidente cu a tuma luga relaciona cu personanan bao di influencia di alcohol.
Homber benta abao na Piedra Plat
Diasabra mardruga un polis na caminda pa cas riba e caminda di Piedra Plat, na altura di Flatstone, a topa cu un homber benta abao. E oficial a baha pa bay wak kico ta pasando e persona unda cu a resulta e homber tabata basta cansa. Tabata peligroso pa keda banda di caminda y asina a solicita dog catcher pa bin busk’e.
Pickup causando peliger
Diasabra den careda di 9.45 di anochi, polis a keda informa cu riba L.G Smith Blvd tin un pickup chevrolet s-10 coriendo basta malo riba caminda. Varios auto a baha caminda pe. Banda di Citgo Blvd patruya di Oranjestad a logra para e auto. A resulta cu e chauffeur ta bastante bao influencia di alcohpol anto a keda deteni y hiba warda.
Vcar casi dal den polis
Riba e caminda di Barcadera diasabra atardi, patruya di St. Cruz patruyando, e oficial tras di stuur a haya ta maniobra pa no hayanan mes den un desgracia. Ta na momento cu un Vcar Mitsubishi a yega sali nan dilanti casi dal den e auto policial. E oficialnan a dicidi di bira bek tras di e auto pa wak kico por a pasa e chauffeur, pensando cu e ta un turista. Ora a par’e, a resulta cu ta un persona local cu tabata burachi tras di stuur. A detene e homber cu a keda transporta despues pa warda di polis.
