Consecuencia financiero improbabel

Aunke gobierno a trek bek durante proceso pa establece un parke di molina di biento na Urirama, prome minister no ta di opinion cu esaki lo yega na consecuencia financiero pa gobierno. Esaki mirando cu tabatin oposicion di parti di comunidad di Aruba, segun e prome mandatario.

E decision cu gobierno di Aruba a tuma ultimo pa retracta e permiso di operacion di Windpark Urirama N.V. pa por traha un parke di molina na Urirama ta coincidi cu e decision cu no lo cambia e area berde protegi aki pa destino di desaroyo.

Parke di molina na otro luga menos Urirama

Prome minister Evelyn Wever-Croes (MEP) antayera a elabora riba e topico aki, bisando cu ‘e no ta un secreto cu e gobierno aki no ta kere den e proyecto di Urirama’. Esaki entre otro pa via di e echo cu e area unda esaki lo a establece su mes lo keda como area berde den plan di desaroyo teritorial.

Ademas pa parti di energia, prome minister a splica cu aunke gobierno no ta mete mucho den con ta yega na e meta di energia sostenibel y limpi, si e companianan estatal cu ta ehecuta esaki mester tene cuenta cu e energia aki por depende riba dje, no ta mucho caro y ta sostenibel. “Poco poco nos mester bira menos dependiente riba crudonan.”

Manera nos a publica anteriormente, esaki no kiermen cu e parke di molina no lo bin, solamente cu esaki lo mester destina pa otro area. Sra. Wever-Croes a subraya cu gobierno ta kere den energia sostenibel, pero cu alabes mester busca un combinacion apropia di e diferente formanan cu por yega na energia sostenibel. “Pa Aruba e mester ta un mescla. Poco energia di solo, poco energia di biento y poco otro sorto. Corda bon, nos tin un lama cu por genera hopi ola y cu por genera hopi energia. Esey nos ta haciendo cu diferente instancianan. Pa yega na kico ta e mescla exacto.”

Actualmente gobierno ta enfocando riba energia di solo, mirando cu por conta riba esaki riba nos isla y ‘e tecnologia ta menos invasivo y poco mas barata’.

No tabatin contracto pa traha molina
Pa loke ta trata e echo cu gobierno a kita e permiso di e compania pa establece un parke di molina na Urirama, e consecuencianan financiero pa e compania a keda como punto di atencion. Segun sra. Wever-Croes, ‘si gobierno trek bek mientras tin contracto cu un compania e ora ey esaki por nifica cu tin un riesgo pa ta responsabel pa gastonan. Specialmente si por ehempel pa construi un edificio gobierno ta bira bek y mita di e edificio ta construi caba’. “Esey ta un consecuencia financiero realistico.”

Sinembargo, pa loke ta trata e molinanan di biento prome minister a splica cu ‘nan no tabatin contracto pa traha molina’. Loke cu si tabatin contracto riba dje ta entre e compania y WEB ‘en caso si nan logra genera energia, cu WEB lo tuma e energia aki’. Pero mirando cu nan no a logra genera energia, prome minister a splica cu ‘WEB no ta mara na dje’.

Alabes segun sra. Wever-Croes, ‘cu gobierno di Aruba mes te cu dia di awe mi no a weita nada firma cu e compania aki’. Te hasta el a splica cu gobierno a pidi esaki di e compania pero ‘nos no a haya nada di nan por cierto’.

”Nan lo por bay bisa cu si, pero boso a duna nos e impresion cu nos lo por cuminsa y cu nos a haci cierto gasto, wel, mucho gasto nan no a haci. Pasobra no tin niun molina ainda. Y mi no ta kere cu nan lo ta exitoso den esey, pasobra nan tabata sa di prome dia cu comunidad di Aruba no ta di acuerdo cu esaki. Tabatin casonan den corte, pues nunca bo por bisa cu mi ta bay confia cu mi por cuminsa si tin e casonan den corte. Y mi ta pone e toke personal tambe cu nan mester por a conta cu e echo cu gobierno a cambia y esaki no ta sigui. Mi tabata den corte cu nan representando un habitante y nos semper a bisa cu dia cu gobierno cambia e proyecto aki no ta sigui.”

Finalmente, prome minister no ta di opinion cu lo tin algun consecuencianan financiero pa gobierno di parti di e proyecto aki.