Concepto ley defensor publico 1 aña wardando na parlamento

Desde juli 2016 e concepto di ley cu ta regla pa nos pais haya un defensor publico (ombudsman) y un defensor publico special pa mucha (kinderombudsman) ta na parlamento. Pregunta ta dicon parlamento no ta trata e ley aki cu ta un paso grandi pa pueblo por busca nan derecho.

 Ciudadano por acudi na e defensor den caso cu nan ta sinti gobierno no haci nan trabou bon por ehempel. Nan por entrega keho y asina e defensor por cuminsa un investigacion y asina yega tambe na recomendacion y instruccion na e aparato publico.

 Siman pas Aruba tabata bou critica como cu nos pais no tabata presente na e conferencia pa defensornan publico di e region Caribe. Mas tanto:  mayoria di e paisnan tin un defensor mientras Aruba ainda no tin y den Reino no ta e unico pais cu ainda ta falta un defensor publico. Corsou por ehempel tin un pa mas cu 10 aña caba.

No ta cu Aruba no a purba, asina parlamentario Marisol Lopez Tromp ta conta. Pa mas cu 20 aña a bin cu diferente iniciativa di yega na e instituto. E ta conta nos partner den noticia, Ret Karibense, cu den tur e añanan nunca a yega leu pasobra semper tabatin un partido politico cu a bin cu e proposicion. Anto niun a yega na un sosten di tur partidonan pa yega asina leu. Te cu dos aña pasa. Durante e encuentro entre e parlamentarionan di Reino IPKO a dicidi cu mester realisa e proyecto. Despues

E defensornan publico di e otro paisnan den Reino a bishita Aruba. Nan a intercambia experiencia.Sra. Lopez Tromp a bisa cu el a dicidi di lanta un comision parlamentario special. Pronto e fraccionnan di AVP, MEP y PDR a yega na un proposicion muteo y asina e ley a yega cla na juli aña pasa. Den Reino a palabra cu Aruba tin un defensor activo prome cu juli 2017. Pero e ley a keda pega na parlamento. Dicon ainda e no a wordo poni riba agenda pa tratamento, Sra. Lopez Tromp ta bisa cu e no sa. Desde el a baha como presidente di parlamento, e presidente actual (Mervin Wyatt-Ras) ta esun encarga cu e proyecto.

“E unico cos cu mester ta e boluntad politico pa pone e ley aki riba agenda pa tratamento. Mi lo manda un carta awor pa presidente di Staten pa pidi pa haci esaki”, asina Sra. Lopez Tromp ta expresa.

Eleccion
E ta hopi importante segun e, pa parlamento trata e ley prome cu eleccion di 22 di september. Como cu e ley tin e sosten awor di tur e tres fraccion den parlamento. “Y bo no sa kico lo pasa despues eleccion.”

Riba e pregunta si Aruba realmente ta haya cu mester bin un defensor publico, e parlamentario ta contesta: “Sigur cu si. Aruba ta haya cu mester bin un ombudsman pa defende hende, mucha. Pero tambe pasobra anos como miembronan di parlamento tambe ta actua un tiki como un defensor, pasobra tin un necesidad bou pueblo pa esaki. A pesar esaki mester ta algo separa. Parlamentarionan mester haci e control riba gobierno.”

Positivo ta cu si parlamento lo aproba e ley di defensor publico awor, nos pais no solamente haal in e retraso pero hasta ta core dilanti, como cu e ley tambe ta regla e institucion di un defensor publico pa mucha y mayoria paisnan den e region Caribense no tin un defensor special pa mucha ainda.

 

 

 

You May Also Like

mas noticia send (12) (Small).JPG

Ciclista a dal riba auto na Adriaan Lacle Blvd

Diabierna anochi riba e caminda di Adriaan Lacle Blvd panort di e luznan di ...

situacion aborto pro bida.jpg

Aborto ta un taboe cu poco poco ta cuminsa habri na Aruba

Vanessa Croes- Croes  ta coordinador di caminata Pro Bida Aruba cu e aña aki ...

Bureau Rampenbestrijding a tene training di tsunami

Ayera mainta a tuma luga e training di tsunami aki na nos isla bou ...

Indicacion fuerte cu a suspende Minister Paul Croes

Un rato pasa a drenta informacion di un fuente digno di confiansa cu tur ...

Discrepancia hopi grandi den prijs y calidad di producto

Gobierno mes ta regula e prijs di 16 producto cual ta wordo yama e ...