Diasabra awor 7 di augustus lo tuma luga e celebracion di cuatro aña di Go Cultura Foundation na unda lo wordo presenta e concierto acustico ‘Sali fo’i cas bek’ na Cas di Cultura.

Asina a informa pa Bon Dia Aruba Edjean Semeleer ken ta fundado y embahador di Go Cultura na unda el a trece dilanti cu pa e motibo di e cuatro añanan aki nan a dicidi di haci full un luna di evento y proyectonan pa conmemora e fecha di 17 di augustus cu ta e dia oficial cu Go Cultura a cuminsa existi oficialmente.

Semeleer a splica cu nan ta un fundacion cu ta propone pa haci diferente proyectonan realidad, continuamente e fundacion tin mester di fondonan pa por cumpli cu e actividadnan ey na unda semper nan ta busca formanan creativo pa haya fondo.

“Nos ta un fundacion hopi proactivo pa nos mes por genera nos fondonan tambe y ta p’esey cu nos a dicidi di haci un concierto pa recauda fondo pa nos por sigui ehecuta proyecto y tambe pa nos por haci nos proyecto mas nobo cu ta yama Go Cultura Channel un realidad”, el a bisa.

Di esaki, el a declara cu ta un plataforma online cu lo bay presenta y estrena diferente tipo di programa, tin algun cu a wordo bin presentando riba nan Facebook Page caba manera Semeleer su top show, otro cu ta yama Ban Papia Cultura, un video cu nan ta presenta di dialuna pa diabierna cu ta yama ‘Bedei nos Papiamento’ y cu asina mes tin plania otro programa di documentario biografico cu ta bay wordo estrena dia 7 di september na unda bes pa siman nan lo pone enfoke riba un persona creativo local, sea cu ta na bida of el a fayece caba cu nan lo presenta nan bida y nan legado cu nan ta laga atras.

Pa loke ta trata e concierto di diasabra awor, el a menciona cu e lo tuma luga na Cas di Cultura pa motibo cu ta e teatro nacional y ademas ta un di e localidadnan cu tin un acuerdo cu Crisis Team y Departamento di Salud Publico na unda lo tene tur hende na reglanan y protocol cu ta wordo presenta cu pandemia di Covid-19.

El a sigura cu e personanan cu lo asisti na e concierto aki por sinti nan mes bon y cu nan ta den un entorno sigur considerando cu e casonan activo ta aumentando dia pa dia, aunke e cantidad di hende lo ta limita den e sala.

Semeleer lo ta e protagonista diasabra awor hunto cu su orkesta y tambe lo tin un artista hoben invita cu no solamente lo ta perform como cantante sino tambe como musico “esey ta un di e cosnan cu a resalta cu Go Cultura, cu nos ta crea plataforma pa talento local di tur edad pero dunando e hobennan e oportunidad tambe pasobra no tin hopi plataforma y specialmente den pandemia aki, el a bira mas desafiante pa e artista por practica su arte y presenta su creacion”, Semeleer a comenta.

Parti di e proyecto di cuatro aña tambe ta y lo depende di e situacion actual cu Semeleer hunto cu su musiconan caminda cu nan lo pasa y duna un concierto mas chikito na varios casnan di cuido “pero esey ta depende di e situacion di e pandemia” nan tin palabracionnan por ehemplo, cu Maristella, Imeldahof, Pasadia Briyo di Solo entre otronan cu ya tin fecha caba pero mester wak e situacion prome pa wak si nan por haci’e.

Ora esey lo mehora nan lo kier haci e iniciativa aki pa “alegra curason di e hendenan aki tambe, cu no tur ora ta experiencia algo cu e publico general ta experiencia” y full e proceso aki lo wordo graba, Semeleer a aclaria cu no precisamente e hendenan sino e musiconan bishitando diferente institutonan cu ta cuida di e hendenan di tur edad pa promove un tipo di idea cu lo ta great pa tambe duna di nan tempo pa por ta boluntario pa un causa cu e persona mes ta haya importante.

Asina mes, el a sigura pa Bon Dia Aruba cu e lo haci un combinacion di su mesun exitonan pero tambe di covers na e concierto cu nan a parti’e den diferente segmento “mi tin un idea caba kendenan ta bay na e concierto y kico nan ta gusta por ehemplo, algun canticanan di telenovelanan Venezolano”, el a menciona.

Lo tin un otro parti cu ta bay ta mas alegre, mas bailabel y otro cu lo ta enfoca riba canticanan popular na idioma papiamento y cu e concierto mes lo tin un toke basta romantico.

Pa personanan interesa pa haya un carchi y por asisti na e concierto acustico ‘Sali fo’i cas bek’ por tuma contacto cu Edjean Semeleer mes na su number di telefon 569.5442 y via Facebook di Go Cultura Foundation, y tin delivery inclui pa full Aruba.