editorial.jpg

Nos no a yega ni na un siman despues di e anuncio di e acuerdo cu Citgo y ya e fiesta di duda y rumornan a cuminsa. Segun e agencia di noticia Britanico Argus, e parti Mericano di e gerencia di Citgo ta rabia cu e deal cu e Venezolanonan a cera pa e compania. Nan tin miedo cu e deal ta bay afecta e posicion financiero di e compania. Den e editorial aki a mustra recientemente caba riba e debenan biyonario cu Citgo a acumula cerando prestamo grandi pa pasa e placa pa un gran parti pa PDVSA como dividendo. PDVSA mes a pasa e asunto di e deal cu Aruba pa Citgo, ya cu nan no por maneha esaki financieramente. E aña aki so PDVSA tin como 10 mil miyon dollar di debe riba bono pa paga o refinancia, riba cual den medionan internacional financiero tin duda grandi si PDVSA por cumpli cu su pagonan o lo por default den e aña aki.

E acuerdo cu Aruba realmente ta pone Citgo como empresa den problema innecesario, pasobra e empresa cu ta refina y bende producto petrolero riba mercado Mericano, no tin mester di e deal aki pa por sobrevivi. Nan no tin mester di e produccion di crudo mehora di Aruba ya cu nan tin acceso directo na crudo Mericano di excelente calidad pa por opera nan refinerianan. Ta e relacion cu Venezuela, na nivel di e compania madre y di gobierno, ta haci cu e compania tabata na mesa, y manera a resulta awor, na un manera cuestionabel.

Den e caso di e deal cu Aruba, e critica di den Citgo ta cu e CEO Nelson Martinez, hunto cu un abogado ex empleado di Citgo, a  tuma na su encargo yega na e acuerdo cu Aruba, sin conocemento di e resto di e directiva di Citgo. E deal ta hinca Citgo den problema financiero grave den un situacion unda Citgo no por fia mas pa PDVSA, ni pa su mes. Segun fuentenan Venezolano, tabata papia inicialmente di un 450 miyon dollar di inversion, cu diripiente a bira practicamente un biyon di dollar, sin cu e responsabel nan  financiero y administrativo di e empresa tabata involucra.

E acuerdo cu gobierno di Aruba lo impone e obligacion riba Citgo pa bay busca otro mil miyon dollar riba mercado pa financia reapertura di e refineria como ‘upgrader’. Un di e problemanan ta cu den e refinanciamento di debe reciente pa logra haya placa pa PDVSA, Citgo a compromete su mes cu garantia pa su acreedornan di tal forma cu lo no ta facil pa simplemente busca mas debe sin cu e acreedornan aki ta cay  aden. Ta bay depende di e situacion legal como compania Mericano si lo ta posibel pa gobierno Venezolano, via PDVSA y e dos compania holding na Merca mes cu tin entre Citgo y PDVSA, logra obliga Citgo bay fia placa grandi asina pa financia algo cu ta contra nan interes economico como persona huridico Mericano. Asina ta  parce anto cu e eventual deseo/obligacion di Citgo pa lanta tanto capital pa cumpli cu e acuerdo cu gobierno di Aruba, no ta necesariamente den nan mes man.

Di banda Venezolano, e critica a cuminsa lanta contra PDVSA y gobierno Venezolano, pasobra  lo a bay di acuerdo sin aprobacion previo di Asamblea Nacional, unda e oposicion contra Maduro tin un mayoria. Sin duda algun, den e dianan venidero oposicion, cu awor ta mas ocupa cu e accion pa logra destitucion di presidente Maduro, lo bay atende e asunto aki. Cu Venezuela unda gobierno ta na rand di abismo, no ta sigur con esaki ta bay keda. Tambe tin e interogantenan encuanto e construccion di e tubo di gas cu mester bin di Punta Cardón te na e refineria na Aruba. Esaki, manera nos a comenta anteriormente den e editorial aki, lo mester envolvimento di e paisnan na nivel mas halto di gobernacion, esta di Reino Hulandes y di Republica di Venezuela.

Na Aruba, cu tur partido politico den parlamento den completo euforia tocante e acuerdo, e aprobacion den parlamento lo no ta mas cu un formalidad, a menos cu e partidonan lanta for di soño y cuminsa realisa cu no ta tur cos ta ‘color de rosa’ den e asunto aki. Esey ta conta na prome luga pa esnan den oposicion cu durante lunanan a laga gobierno dal bay cu negociacion sin cuestiona practicamente nada, pa awor nan spierta den un situacion diferente. Na e momento aki ta totalmente irelevante ta ken tin mas merito den e asunto di reapertura, gobierno of e partidonan den oposicion. Loke ta necesario awor ta lanta y cuminsa analisa e situacion aki cu ta parce di tin hopi aspecto scondi aden. Cuidao cu nos no ta bayendo den direccion di un proyecto a la “Race Track”, cu por tin yen di consecuencia financiero desagradabel pa nos pais. Atrobe, nos no por haci mucho mas cu exigi di gobierno di practica transparencia y informa comunidad ampliamente tocante e asunto aki.  

LEAVE A REPLY

Please enter your comment!
Please enter your name here