Gobierno cu cuatro dia ainda pa trata presupuesto
E confusion encuanto tratamento di presupuesto 2016 ta birando completo. Di su banda, presidente di Parlamento ta bisa cu en realidad no a pospone tratamento, sino cu no a yama reunion, simplemente. Esaki cu e argumento cu te awe e contestanan riba e preguntanan di e miembronan di parlamento haci na e diferente ministronan y esun di Finanza en particular, no a drenta ainda.
No ta conoci tampoco ki dia esey lo por tuma luga. Esaki ta mustra serio pero ta algo cu solamente gobierno mes por soluciona, entregando e contestanan pidi. Si nan no yega na tempo, probablemente gobierno lo bay culpa su propio presidente di Parlamento cu no a convoca reunion na tempo. Esaki lo añadi mas ainda na e ambiente dificil cu tin caba.
Di otro banda tin comentario cu ta bisa cu falta firma di un di e ministronan riba e presupuesto. Esey ta straño pasobra e ‘aanbiedingsbrief’ cu a drenta Parlamento dia 15 di December 2015, acompañando e diferente documentonan cu hunto ta conforma e proyecto di ley di presupuesto, tabata firma pa tur ministro. Pues nos ta laga e parti ey un rato pa loke e ta. Mas interesante ta si e ministro en cuestion, di Turismo, Transporte y Cultura, lo ta presente den parlamento hunto cu su coleganan.
Manera e situacion ta actualmente, unda e no ta atendiendo reunionnan di conseho di ministro, si nos informacion ta corecto, lo no ta facil pa sinta hunto y defende e maneho general di gobierno. E ministro por opta pa keda keto ora ta trata aspecto di e maneho di su coleganan cu cual e no ta di acuerdo eventualmente, pasobra e no tin mester di contesta pregunta ni comenta riba aspecto cu no ta concerni su carteranan.
Intervencion di Reino?
Di biaha tambe nos ta haya e speculacionnan encuanto un intervencion di gobierno di Reino. A sali publica un entrevista cu parlamentario Bosman di VVD, cu a declara cu algo lo bay sucede si pa 1 di februari no tin presupuesto aproba. Naturalmente esey ta solamente e opinion di un parlamentario di un fraccion cu ta sostene gobierno, y no necesariamente significa cu gobierno di Hulanda ( y di Reino) tin pasonan concreto pensa caba. Hecho ta si cu e condicionnan pa problema t’ey caba.
Tin un conseho negativo caba di CAFT, mas un conseho similar di Raad van Advies. Si e presupuesto keda aproba manera e ta awor, lo sigui un rapport negativo di CAFT despues di esaki, cu un recomendacion na gobierno di Reino pa tuma paso. Mientras pa basta tempo gobierno Hulandes a keda keto encuanto Aruba su problemanan cu presupuesto, esey no kier men cu nan no ta sigui e acontecimento aki.
Pero, manera nos a trece dilanti na varios ocasion, gobierno di Aruba y mas specificamente premier Eman, tin amigo tambe na Hulanda, specialmente den ministerio di Asunto Exterior. Nan ta mira un papel di promocion ainda pa Eman den su rol di representante di un “Small Island Developing State” (SIDS) cu por yuda Hulanda den lobbymento pa un asiento den Conseho di Siguridad di Nacionnan Uni. E carta ey cu Eman tambe ta hunga di su banda, sin embargo por bira uno obsoleto, na momento cu e asunto di presupuesto bira asina grave, cu e consideracion pa cu Asunto Exterior no tin peso mas.
Kico e ora un ‘aanwijzing’ di gobierno di Reino por encera? Adaptacion obligatorio di e presupuesto, modificando entrada y gasto den esaki. Si aumenta entrada, no ta algo cu ta haci riba papel so, pero lo duna instruccion pa tuma e medidanan corespondiente pa e placa ey drenta caha di gobierno tambe. Esey por ta e introduccion di e ABB mas tempran posibel den e aña aki ainda. Aumento di BBO ta keda e medida mas simpel pa ehecuta, aparte di gusta o no gusta esaki.
Cortamento di gasto sigur lo bay toca gasto di personal, e dolor di cabes mayor di semper. Na e momento aki, gobierno y su fraccion ta bay linea recta den direccion di hinca nan cabes den e strop, aprobando e presupuesto manera e ta awor. E impresion ta cu nan ta prefera esaki, en bes di cambia e presupuesto nan mes y tuma e medidanan corespondiente tambe. Ta mas facil bisa cu ta Hulanda ta haci fastioso y cu ta Hulanda ta obliga nan tuma medida.
Pa mantene apoyo politico esaki ta di gran importancia y a bira mas importante ainda na momento cu e posibel kiebra den partido ta significa cu tur cos ta orienta na mantene un apoyo popular mas amplio posibel. E silencio encuanto e situacion entre ministro Oduber y e resto di e gabinete ta indicando mas y mas cu e kiebra ta definitivo. E problema ta cu entretanto tin un pais y un economia cu ta gritando pa liderazgo, no di palabra bashi, sino di un man sigur cu ta habri caminda pa sector priva por traha.
Lamentablemente nos no ta mira cu e instancianan cu mester bisa bon cla cu e incertidumbre aki no por continua, ta tumando un actitud di sinta warda.
