Un colaboracion entre MFA y CEDEHM a bira conoci par di dianan pasa den un conferencia di prensa pa asina e organisacion keda presente den diferente barionan rond di Aruba y tambe unda hende muhe di Aruba ta.
Miangela Ras hoofd dienst di Centro di Desaroyo di Hende Muhe (CEDEHM) a informa comunidad di Aruba pa participa den un Bazar di Pasco cu lo tuma luga 2 di december na MFA di Paradera cu lo cuminsa for di 6or di atardi te cu 10or di anochi.
“Nos kier encurasha pueblo di Aruba completo, nos hende muhenan pa bin e Bazar di Pasco aki unda ta dunando oportunidad na nos hende muhe pa bende nan creatividad, loke nan ta haci cu nan ma, y tambe loke nan ta cushina, esaki ta un oportunidad grandioso cu nos ta haya di CEDEHM for di MFA”, Ras a menciona.
E dia aki lo tin musica, diferente cuminda y creacionnan haci pa hende muhe unda famia lo por uni na e iniciativa aki pa duna sosten na hende muhe cu ta ‘lora nan man’ unda parti di nan ta clientenan mes di CEDEHM cu tambe a cuminsa como cliente tambe y finalmente nan a habri nan mesun negoshi unda e organisacion ta sigui dunando nan apoyo na nan.
Pa esunnan interesa, Ras a bisa cu tin algun luga habri ainda pa por participa e dia aki, unda por tuma contacto via nan Facebook page di CEDEHM pa haya mas informacion.
E evento lo tuma luga den a parti di paden di MFA di Paradera segun a informa pa motibo cu ta un espacio amplio y pa asina ey no lo tin e preocupacion cu awa por yobe e dia ey.
