Conseho di Europa ta introduci traduccion di Derechonan Humano na Papiamento: “Cada persona, hasta e criminal mas pisa merece reconocimento di su derecho humano”

Tur hende na Aruba awor por lesa den Papiamento kico ta su derechonan humano segun Corte di Derechonan Humano di Europa. Recientemente representantenan di Conseho di Europa, Clare Ovey hunto cu Representante di Reino den Conseho di Europa, Fay Keeris tabata na Aruba pa hunto cu Minister di Husticia Arthur Dowers introduci e buki, traduci pa Ramon Todd Dandere.

Un buki cu mester duna claridad kico ta e derechonan cu tambe ta mara na e derechonan universal segun Nacionnan Uni, pero cu danki na e Corte na Strasbourg, ta brinda e arma necesario pa forsa implementacion di esakinan tambe.

Conseho di Europa, pa tal motibo mes, a organisa un conferencia riba Derecho Humano na Universidad di Aruba, unda no solamente a ilustra e balor di e derechonan aki, sino con cada persona na Aruba por tin acceso na Corte Europeo pa Derechonan Humano y asina percura cu berdad Gobierno y su institutonan, ta respeta esakinan.

E enfoke di e reunionnan na Aruba tabata hopi riba kico ta derechonan di hende, y entre otro a usa e caso di James Murray como ehempel, E caso Murray manera ta conoci, a sacudi tanto Corsou y Aruba. Murray, naci na Aruba, a abusa y mata sobrina di su ex amiga na Corsou como revancha pa motibo cu e ultimo a kibra relacion cu n’e. Murray a ricibi castigo di bida largo y e ultimo fase di e castigo a pas’e na KIA.

A pesar di a pidi Clemencia, Murray a keda sera den KIA te na su morto. E punto di derecho humano sinembargo no ta pa trece den disputa e castigo di bida largo, sino bou cua condicion Murray, cu a pesar di e hecho, a keda cera, sin cu a brinda oportunidadnan pa rehabilitacion.

Conclusion di e analisis segun derechonan Europeo

Minister Dowers kende a habri e sesion na Universidad di Aruba a bisa cu e trabou pa traduci e derechonan Europeo na Papiamento ta un paso pa esakinan bira parti di bida diario di tur cu ta biba na Aruba. E tratado, traduci awor na Papiamento, ta fundamental pa Gobierno y tur partido sa kico ta nan obligacion y cu mester haci tur esfuerso pa cumpli cu derechonan fundamental di tur hende. Particularmente, conscientisacion ta yuda pa evita abuso contra e derechonan aki. “E tratado aki ta proteha esnan den comunidad contra abuso di poder di particularmente Gobierno.”

Aunke cu e tratado Europeo di Derechonan Humano no ta regla e relacion entre individuonan, proteccion di derecho di cada uno ta regla si den e diferente leynan di Aruba mes. Aunke cu e tratado a bin na vigor despues di Di Dos Guera Mundial, Minister Dowers ta bisa cu ta di lamenta cu te ainda rond mundo, hasta na Europa ta violando esakinan regularmente, y cu ta importante pa hende compronde cu proteccion di derecho humano ta esencial sigur tambe pa democracia por sobrevivi.

Director di e Division di Derechonan Humano di e Conseho di Europa, Clare Ovey a bisa cu meta di su bishita tabata pa amplia conocemento riba e derechonan humano memey di comunidad di Aruba pero tambe pa papia di e caso Murray. “Reino Hulandes, como tal, Aruba tambe ta participe na e tratado y di e forma aki, tur hende por presenta un caso na e Corte Europeo di Derecho Humano. Na momento cu e Corte bin cu su veredicto, e ta obligacion di e pais pa sigui e instruccion,” Ovey a ilustra. “E caso di Murray ta uno di speransa y di redencion.

E ta nifica cu hasta un persona cu comete e crimen di mas horendo, tin e derecho pa traha riba su mes, busca tratamento y atende kico a causa e fayo.” Ovey a enfatisa cu cada persona tin derecho pa rehabilita y e posibilidad ey no tabata existi pa James Murray. “Nos tabatin reunion interesante unda ta mira cu e posibilidadnan awor ta existi.

E no ta nifica cu prisoneronan cu haya bida largo lo sali di prison, pero si cu nan tin e derecho pa haya speransa.” Ovey a reconoce cu tur victima y nan famia tambe tin nan derecho pa proteccion y no ta cuestion cu mester lubida riba nan, “pero esun cu a comete un crimen no ta perde su derecho humano y aunke cu e no mester sali liber, e no por perde speransa tampoco.

Ademas, e ta un balor Cristian unda tur hende merece merced.” Durante e conferencia a enfatisa tambe cu derechonan humano ta conta pa tur hende, y si cuminsa mina derecho di un, finalmente por mina derecho di tur cu tur consecuencia pa democracia.

Fay Keeris como Representante di Reino na Strasbourg a ilustra e trabounan cu a haci hunto cu Ministerio di Husticia di Aruba, pero tambe cu Universidad di Aruba, Orden di Abogado y tambe oficina di Ombudsman pa a organisa e conferencia riba Derechonan Humano y e proceso pa yega na Corte Europeo. “E tabata un momento bunita pa presenta e buki traduci na Papiamento,” Keeris a ilustra.

Bon Dia Aruba a tuma contacto cu Ramon Todd Dandere kende ta orguyoso di por a haci e traduccion di e Derechonan Humano segun e Tratado Europeo. E linguista reconoci di Aruba ya a traduci e tratado di Derechonan Universal di Nacionnan Uni na ocasion di su 50 aniversario.

Un di e derechonan principal ta e derecho di idioma di minoria of lenga materno y pa e luchador pa Papiamento, e ta ilustra un biaha mas cu e idioma materno di Aruba ta suficientemente rico pa cualkier traduccion di magnitud grandi, y esun di derechonan sigur ta hopi grandi. Den su concepto e trabou ta enfatisa e balor di conscientisacion di derechonan individual, pero tambe e balor di Papiamento como idioma materno di Aruba.

Bon Dia Aruba lo amplia riba e conferencia di Derecho Humano, cu a inclui tambe un discusion di panel, unda a elabora riba e proceso cu mester cana pa yega na Corte Europeo y kico e implicacionnan ta di e tratado pa proteccion contra violencia domestico te na trahadonan den sector turistico, por ehempel.