E esencia di e proposicion di rijkswet pa e Organo di Reforma y Desaroyo, COHO, ta keda afirma pa Raad van State. Esey ta reaccion di Secretario di Estado pa Asuntonan di Reino, Raymond Knops, riba publicacion di e conseho cu pa ley, mester keda confidencial te ora cu yega na e Parlamentonan.
E conseho di Raad van State a keda parcialmente publica riba e website www.dossierkoninkrijksrelaties.nl.
Raymond Knops den su reaccion a bisa cu Raad van State di Reino a duna su conseho riba e rijkswet pa lanta COHO dia 11 di Maart. Durante un reunion entre e Secretario di Estado y e tres Promer Ministernan di e paisnan envolvi, esta Corsou, St. Maarten y Aruba cu a tuma lugar 18 di Maart, a palabra cu e conseho ta uno confidencial y unicamente lo por keda publica unavez e proposicion di ley y reaccion di tur cuatro pais lo keda presenta como proyecto di rijkswet na Tweede Kamer y Parlamentonan di e paisnan. Esaki ta manera ley riba conseho di Raad van State ta prescribi y ta manera ta traha normalmente.
Pa motibo cu ta parce cu a laga lek e conseho confidencial y a reparti esaki grandemente, “locual nos ta lamenta,” Raymond Knops riba conseho di Raad van State y den palabracion cu e otro paisnan a publica esaki. E publicacion aki ta hopi inusual y ta pa motibo di e caracter specifico di legislacion di ley di consenso.
“E esencia di e proposicion di rijkswet ta keda conserva den e conseho di Raad van State. Den e conseho ta bisa cu ta logico cu Hulanda ta mara condicion na otorga sosten financiero. Mas aleu, e ta bon pa observa, cu otro cu locual a keda sugeri, cu e proposicion di rijkswet COHO, no ta contra Statuut. E ta normal cu Raad van State ta analisa criticamente tur ley y riba esey nos lo bay den deliberacion cu e paisnan,” Knops a bisa.
Mientras tanto ya caba tin algun luna ta trahando cu Corsou, St. Maarten y Aruba pa, a base di e landspakket pa cada pais, duna forma na e agenda di ehecucion. Segun Raymond Knops a logra progreso concreto. “Esaki ta sucede, manera e Promer Ministernan di tur tres pais ya caba a bisa, den bon colaboracion cu nan. E bon colaboracion ey nos ta spera di por sigui na momento di formula un reaccion riba e conseho di Raad van State.”
E promer medio cu a publica un compilacion di e conseho di Raad van State tabata www.dossierkoninkijksrelaties.nl. Ta trata di un website cu a keda lanta dia 14 di Januari, 2021, pa medio di e compania hosting Tiscom Hosting B.V. Dossierkoninkrijksrelaties.nl ta di e mesun publicista di www. koninkrijksrelaties.nu cu entretanto no ta activo mas. Ta trata di Rene Zwart kende pa hopi aña tabata skirbi publicacionnan na Hulanda pa Gabinete Mike Eman 1 y 2.
