Despues di 6 aña cu e proyecto renobacion y expansion di Horacio Oduber Hospitaal (HOH) a cuminsa, minister di Salubridad Publico, Dangui Oduber a declara na Bon Dia Aruba cu porfin nos por mira un luz na horizonte. Pa otro aña – si tur cos ta bay manera plania – e proyecto lo wordo entrega completo.

Un proyecto cu a resulta mas costoso di loke inicialmente a wordo presupuesta y den su fase final mester di mas fondo adicional pa bin totalmente cla cune. E fondo aki ta wordo calcula rond di 20 miyon florin pa termina e proyecto.

Actualmente nan ta bezig cu minister di Finanzas y minister presidente tambe, hunto cu Stichting Onroerend Goes Aruba (SOGA) y hunta directiva di HOH pa analisa kico ta e miho solucion pa gobierno por busca e fondonan necesario pa finalisa e proyecto aki. “Pasobra bo no kier laga e proyecto aki manera cu e ta. Unabes cu nos a yega asina leu, nos kier pa e wordo ehecuta y termina tambe,” minister Oduber a bisa.

E ta haya cu e proyecto aki no mester a dura asina largo y tampoco e no mester a costa asina hopi. Te aworaki e proyecto aki a costa rond di 900 miyon florin. Un aspecto tabatin di haber cu e salanan di operacion cu a wordo lubida.

El a bisa cu e sala di operacion ta un di e areanan cu ainda mester wordo entrega. E mandatario a trece dilanti cu net prome cu e coalicion actual (MEP-POR-RED) a drenta Gobierno, ex minister Alex Schwengle a bay Parlamento pa pidi 80 miyon adicional pa por caba loke no a wordo inclui inicialmente den e proyecto aki.

Desde cu nan a drenta gobierno – segun minister Dangui Oduber – nan no a bay bati na porta di Parlamento pa pidi fondo adicional. Pero aworaki si ta yegando un momento cu ta bay tin mester di extra fondo pa termina e proyecto di hospital.

E acuerdo entre SOGA y e contratista OHL-ARELLANO ta yegando su final y un decision mester wordo tuma, segun e mandatario. E ta haya cu mas probabel ta cu SOGA ta sigui cu e contratista OHL-ARELLANO, ya cu dificilmente bo mester cuminsa un destaho publico di nobo pa termina e proyecto aki cu e contratista actual ta conoce pa 6 aña caba.

Minister di Salubridad Publico, Dangui Oduber a declara na Bon Dia Aruba cu e proyecto aki a dura mas di loke mester dura debi na varios reto cu ta conoci den opinion publico. Te hasta nan mes tempo di oposicion, nan tabata critico riba e proyecto aki. Pero e mandatario ta satisfecho cu durante e ultimo lunanan nan por wak un adelanto den e comunicacion y e trabao cu ta tumando luga pa finalisa cu e proyecto aki.

 

LEAVE A REPLY

Please enter your comment!
Please enter your name here