Contraloria General a haci un investigacion corto, esta un focusonderzoek, tocante e causanan principal di overtime for di e perspectiva di Cuerpo Policial (KPA), Instituto Coreccional di Aruba (KIA) y Cuerpo Especial Arubano (CEA). Meta di e investigacion ta pa trece dilanti tanto e causanan como tambe e maneho pa controla gasto di overtime.

Durante ultimo añanan, gobierno a pone como meta maneho di overtime, den cuadro di reduccion di gasto di personal, e gasto mas grandi di gobierno. Den ultimo 10 aña, gastonan di overtime a redobla cerca KPA, KIA y CEA. E tres departamentonan aki tin e gastonan mas halto di overtime di Pais Aruba. Esaki ta motibo principal cu Contraloria General a haci un investigacion.

Banda di e departamentonan menciona, a sinta na mesa cu departamento di Minister di Husticia y tambe cu Departamento di Recurso Humano (DRH). Cada departamento a indica cua ta e causanan principal di overtime cu nan ta enfrenta. Contraloria General a analisa e cifranan y a studia tur documento corespondiente.

Durante e mesun periodo, Colegio di Supervision Financiero (CAft) tambe a haci un investigacion riba e problema di overtime. Ambos secretariado a sinta hunto y a delibera riba e tema di e investigacion y e su importancia. Compara cu e investigacion di Caft, Contraloria General a concentra su investigacion solamente ariba KPA, KIA y CEA. E investigacion di Contraloria General ta limita na presenta e causanan principal di overtime, for di e punto di bista di e organisacion y su tareanan.

Causa di aumento di overtime.
Tanto e falta di personal como e ausencia pa motibo di salud (ziekteverzuim), tur tres departamento a menciona como e causanan principal. Ademas di esaki cada departamento a menciona tambe otro causanan cu ta specificamente aplicabel pa nan. Por ehempel Cuerpo Policial a indica como un di nan causanan di overtime e diferente tareanan cu algun departamento ta eherce di cual por categorisa algun como tarea impropio. Tarea impropio ta por ehempel actividad deportivo, caminata religioso y otro actividad publico cu ta rekeri extra personal di polis presente. Contraloria General ta elabora den nan rapport riba e causanan cu a menciona pa cada departamento.

Analisis di e gastonan di overtime y e causanan.
E rapport ta presenta un ilustracion di e gastonan di personal den cada un di e departamentonan investiga, como tambe e fluho di gasto di overtime durante e ultimo tres aña. Cada departamento ta experencia diferente aumento y disminucion di gasto durante un aña. Por ehempel Cuerpo Policial tin un aumento di gasto di overtime den luna di april, cual ta atribui na trahamento overtime durante temporada di Carnaval.

E tabel ta duna un bista di e gastonan relaciona cu overtime como tambe e cantidad di empleado full-time y e cantidad di notificacion di AO, den e ultimo 5 aña. E grafico ta duna bista di e fluho di e gastonan di overtime durante e lunanan (mester tene na cuenta cu pago di overtime ta tuma luga 2 luna despues di a traha).

Maneho y medida pa baha e gastonan di overtime.
Den e ultimo 5 aña, Pais Aruba no a conoce un plan specifico pa purba baha gasto di overtime cerca e departamentonan menciona. E topico aki ta bin riba mesa ora cu minister y e hefenan di departamento sinta hunto, pero ainda no ta existi un plan di maneho concreto pa purba reduci e gastonan aki.

Cada departamento ta responsabel pa tuma e medidanan necesario internamente pa e maneho di e gastonan di overtime. Cada departamento a indica con nan ta maneha e gastonan di overtime y e causanan di overtime; esaki ta varia den departamento. Contraloria General no a duna su opinion riba e maneho di cada departamento pero ta menciona e puntonan di atencion cu cada departamento a indica.

Contraloria General ta limita su mes principalmente na presenta solamente e causanan di overtime segun e departamentonan y e medidanan cu a ser tuma pa tin control riba overtime. Un investigacion mas profundo lo por determina si tin mas causa cu por fundamenta e saldo di overtime, of si e medidanan cu a tuma ta suficiente pa reduci e gastonan di overtime y of si esakinan tabata tin e resultado desea.

Contraloria General kier remarca cu e rapport ta duna un bista di e causanan presenta pa e departamentonan. Un investigacion profundo ta necesario pa determina si tin mas causa di overtime na e departamentonan y si e medidanan tuma pa reduci e gastonan aki, tin e efecto desea.

E version digital di e rapport di Contraloria General ta disponibel via www.rekenkamer.aw.