Algun miembro di sindicato TOPA cu ta trahando na DOW a bisa cu tin dos aña sin haya uniform. Keho di truck den mal condicion y tambe keho cu nan mester di curso pa por haya un aumento den nan salario.
Presidente di sindicato, Rene Bernabela a duna di conoce cu a tende di algun di nan miembro y esunnan cu no ta miembro pa locual ta trata e promocion. E ta bisa cu ta keda responsabilidad di e propio ambtenaar cu ta traha den gobierno, y cu esaki ‘ta conta pa esunnan cu ta traha den DOW’. E ta bisa cu ta keda na nan pa haci peticion pa haya promocion.
Bernabela a bisa cu sindicato ta eynan pa yuda esunnan cu kier aplica pa un promocion. Nan lo duna guia pa e proceso cu tin cu tuma luga y obtene nan promocion. Na e parti cu ta haci e peticion, e ta bay pa gobernador pa medio di e minister concerni.
Segun e ta bisa, minister ta manda e peticion pa DOW pa wak si e trahado ta cay na remarca pa haya e promocion corespondiente. DOW ta manda DRH (Departamento di Recurso Humano).
E departamento ta traha e conseho pa minister concerni, anto hunto ta traha e concepto. Esey ta stap necesario pa un ambtenaar ta cay den remarca pa haya su promocion, pues ‘no ta sindicato TOPA ta duna promocion’. Nan ta yuda e miembro, e empleado publico den e proceso pa hay’e.
“Esey por dura siman, luna y aña sin haya contesta; mientras tanto cu e empleado publico trahando na DOW ta keda sin haya su promocion. E ta un lastima, pasobra mescos ta exigi di e trahado pa cumpli, tambe tin derecho pa haya su promocion. Esey ta e procedura tuma entre departamento DOW y Recurso Humano.”
Bernabela ta splica cu tin un gran cantidad cu ta den spera pa haya nan promocion, sinembargo, trabou tin cu sigui. E ta agrega cu e departamento concerni tin cu zorg pa procedura cana su caminda pa yega na e man di trahado y e por keda satisfecho.
E ta bisa cu sindicato ta haciendo nan maximo esfuerso pa tur por yega na satisfaccion di cada miembro di TOPA, pa nan haya e promocion corespondiente. Sinembargo, ta keda na DOW y DRH pa atende cu e problema y haci aclaracion mas pronto posibel pa e trahado.
Bernabela tambe a splica locual ta e falta di material cu e empleado mester pa eherce su trabou debido na DOW. Na varios ocasion mester sinta cu director, pero el a bisa cu manera e ta den gobierno, ‘pa motibo financiero no tur departamento di gobierno tin e financiamento necesario pa cumpra material’.
E ta remarca cu e ta entre e director di DOWy minister concerni pa zorg pa haya material adecua pa e nan personal por eherce nan trabou debidamente. Tambe sindicato na varios ocasion a haci pregunta riba esaki. DOW ta manda pa pidi conseho na DRH pero no ta haya contesta bek.
