Facebook y Twitter a revela evidencia diahuebs sugeriendo cu esfuersonan Ruso pa interferi den eleccion presidencial Mericano ta birando mas sofistica y mas dificil pa detecta.
E companianan a bisa cu nan a elimina decena di cuentanan falso y paginanan for di nan servicio.
Facebook a bisa cu e red di cuentanan cu a elimina tabata den ‘etapanan inicial’ di crea un audiencia. E tabata opera pa persona na Ghana y Nigeria den nomber di individuonan na Rusia. E cuentanan a post tocante topiconan manera historia di hende color scur, chisme di celebridadnan, y moda.
Twitter, mientras tanto, a bisa cu e cuentanan cu a elimina a purba di sembra discordia enfatisando problemanan social manera rasa y derechonan civil sin faborece ningun candidato of ideologia particular.
E tacticanan cu e cuentanan a usa pa evita deteccion – y cu Rusia esencialmente a sub-contrata e trabou na paisnan den Africa Occidental – ta mustra cu interferencia stranhero ta keda un reto pa Facebook den lunanan na caminda pa eleccion na november.
E cuentanan cu Facebook a elimina tabata enfoca riba crea division racial. Algun tabata pretende di ta organisacionnan no gubernamental legitimo pa gaña hende.
E eliminacion ta despues di un reporte siman pasa cu a haya cu e campaña di Moscu pa interferi den eleccion Mericano no a stop desde 2016, y de hecho a bira mas dificil pa detecta.
E reporte ey, di profesor Young Mie Kim di Wisconsin-Madison, a haya cu cuentanan di rednan social vincula na Rusia ta post tocante e mesun asuntonan divisivo – relacion racial, ley di arma y inimigracion – manera nan a haci na 2016, aña den cual Kremlin a contamina e feeds di votadonan Mericano cu mensahe riba eleccion presidencial. Facebook desde e tempo ey a elimina e cuentanan ey tambe.
Luna pasa, director di FBI, Christopher Wray a adverti cu Rusia ainda tabata participando den ‘guera di informacion’ cu un ehercito di persona ficticio riba rednan social y ‘bot’nan cu a plama desinformacion.
Rusia repetidamente a nenga interferencia den eleccion Mericano.
