Control laboral y cumplimento di ley pa reapertura di refineria

Como “hopi importante” Mediador di Gobierno sr. Anselmo Pontilius a cualifica e echo cu ministerio di Labor a bin cu un Citgo Desk pa atende cu e trahadonan cu ta aspira di traha den e refineria.

Sr. Pontilius a bisa cu nos mester siña di loke a yega di sosode den pasado pa atende cu e reapertura di e refineria di un miho forma pa loke ta e demanda di trahado. “Si dado momento ta wordo comproba cu bo mester cierto cantidad di trahado di pafo, bo lo tin di percura tambe cu nan ta bin y  bay bek”, asina  Mediador di Gobierno a declara na Bon Dia Aruba.

El a bisa cu hopi biaha e importacion di trahado ta bira un problema aunke den e caso di  refineria esaki no ta e caso. Pero – segun sr. Pontilius- lo ideal ta cu e trahadonan local tin e preferencia. Na oficina di Mediador di Gobierno a yega cierto informacion cu ta indica cu tin varios di e companianan cu normalmente ta traha den refineria a sostene un reunion caba cu minister di Labor. Tambe cu e mandatario aki ta riba un solo liña caminda Departamento di Progreso Laboral (DPL) tin un seccion special pa realmente e trahado cu ta interesa pa traha den e refineria.

Cumpli cu ley

E  no ta duda cu reapertura di e refineria ta crea un fuente di trabou y e pregunta logico –basa riba nos experiencia- ta si e companianan cu ta bin traha ta cumpli tambe cu ley. Kiermen si nan ta cumpli entre otro cu e registro di e trahadonan na SVb y e cumplimento di prima cerca nos Banco di Seguro Social. El a corda cu den pasado tabatin compania cu no a cumpli cu ley  pagando cu e primanan na SVb y AZV, y entre otro cu e belasting cu ta wordo kita fei di e salario di e trahadonan sin cu e ta drenta den caha di gobierno. E ta haya cu e biaha aki mester bin cu miho control y tur intencion ta mustra cu esey ta e caso, segun sr. Pontilius. 

Sr. Pontilius como Mediador di Gobierno ta haya cu esaki  ta un bon momento pa departamento di Labor (DAO) conhuntamente cu DPL y e contratistanan cuminsa sinta adelanta prome cu e trabou ta start. Naturalmente sperando cu lo wordo firma un acuerdo final pa e compania Citgo cuminsa opera e refineria na San Nicolas.

El a agrega cu ta di conocemento publico cu e reapertura di e refineria ta rekeri un proceso basta fuerte di renobacion y update prome cu nan ta cuminsa cu e proceso di refinamento di e crudo. “E trabou ta grandi hopi biaha. Te hasta  e ta un trabou di 7×24, pues e ta un trabou basta intensivo”, el a bisa.