Control riguroso riba bendemento di cuminda y bebida durante carnaval

E aña aki, departamento di higiena y siguridad alimenticio ta sigui realisa su control regular, y muy specialmente lo realisa su control riba benta di cuminda durante temporada di Carnaval. Nan lo ta presente den tur actividad di carnaval, principalmente den tur caminda cu tin bendemento di cuminda y bebida.

Director di e departamento aki, Yvette Geerman, a declara cu como departamento di Salud Publico nan ta ehecuta nan funcion. Nan ta bay controla tur e localidadnan cu ta bende cuminda of bebida durante e ruta di e paradanan. Nan mester cumpli cu ley pa loke ta e carchi berde of di salud. Pero tambe nan ta bay controla aspecto di higiena, con nan ta anda cu e benta di cuminda, ya cu nan tarea ta pa protege salubridad di nos comunidad. Ademas garantisa con e bendemento di cuminda y bebida ta bay den un forma corecto, y evita cu tin hende cu por bira malo.

Si nan no ta cumpli debidamente cu e carchi di salud, e ta un acto contra di ley. Esaki kiermen cu, como autoridad di salud, un sancion lo por cay. Nan ta traha cu cooperacion di polis, y esun cu no ta cumpli mester sali for di parada. “Esunnan cu no ta cumpli cu e reglanan di ley pa higiena no mag di bende nan cuminda.”

Diasabra durante e prome parada di Carnaval, nan como departamento di salud a bay riba caya, y p’esey nan a haci un suplica pa tur hende cu a haya permiso pa bende cuminda, pa nan tin tur nan papelnan na ordo. Nan mester tin nan carchi di salud caba, ya cu no ta cuestion di core bay pa saca e carchi pasobra bo ta laat, segun sra. Geerman. Solamente esun cu tin e carchi berde di salud por t’ey pa bende cuminda.

Un punto cu nan mester tene cuenta cune ta e reglanan di higiena: limpiesa, temperatura, labamento di man. Un aspecto importante ta labamento di man. Nan mester tin awa disponibel pa laba nan man y serbete limpi pa nan seca nan man. Nan mester haci uzo di tur e forma cu ta higienicamente posibel na momento di traha cu cuminda y bebida.

Sra. Geerman a indica cu wardamento di cuminda ta keda hopi importante, teniendo na cuenta cu e temperatura ta keda hunga un rol. Pero tambe con nan ta manipula y prepara nan cuminda ta relevante. E departamento aki ta keda duna informacion, y esun interesa por acerca nan como departamento di salud publico.

Tambe nan lo keda activo dunando informacion via prensa durante e temporada aki. Nan lo traha conhuntamente cu tur partner envolvi den carnaval, pa asina durante tur actividad nan por tin un lista di esunnan cu ta bay bende cuminda, pa acerca nan pa asina nan sa e rekisitonan. Nan lo haya tur e puntonan di atencion cu nan mester cumpli cu nan, pa momento cu nan personal bay realisa nan inspeccion, tur cos por ta na ordo.

You May Also Like

Serlimar ta keda encarga cu sushi y maneho desperdicio

E proceso ta continua pa loke ta yega na un solucion duradero pa maneho ...

COA: Plan di maneho y presupuesto 2017 aproba

Comite Olimpico Arubano a tene nan di 2 Asamblea General di e aña aki, ...

A3 tweede kamer venezuela.jpg

Parlamento Hulandes ta haya su gobierno ‘naïef’ pa cu Venezuela

Tweede Kamer ta haya gobierno Hulandes ‘naïef’ y no mucho realistico riba e situacion ...

18Aug EdM Rescate Mucha (1).jpg

Expedicion Rescate Mucha ‘Flashlight’ a yega na su final

Despues di un siman hopi intensivo den MFA Noord, yena di diferente topico, diabierna ...

Aruba Fashion Week a habri oficial

Na Marriott Hotel e edicion 2017 di Aruba Fashion Week a conoce ayera su ...

De Veer: lo reanuda Ecogas dentro 6 luna

E doño di Ecogas Eduardo de Veer ta informa cu lo reanuda operacion di ...