Kier of no kier, AI ta presente, y lo forma un parti grandi di desaroyo socio-economico pa e siglo aki. Den e contexto aki, ta importante pa tur e posible bentaha cu e innovacion aki ta trece, wordo distribui den un manera socialmente husto pa full pueblo di Aruba. Esaki ta trece nos na e tema di economia solidario y cooperativanan social.

Un cooperativa social ta un organisacion di miembronan cu ta traha hunto pa yuda comunidad y no pa maximisa ganashi pa accionista, sino pa crea beneficio real pa su miembronan y e comunidad den contexto amplio.

Loke mi ta propone awe ta lo siguiente: E ora a yega pa Aruba tin su propio Cooperativa Social pa Inteligencia Artificial, un organisacion cu ta pone e poder di AI directamente den man di pueblo trahado, famianan, y negoshinan chikito di nos isla.

Kico ta un Cooperativa Social?

E modelo aki di Cooperativa Social tin su raiznan den movementonan di trahadornan di siglo 19 na Europa, caminda trahadornan a uni forza pa proteha nan mes contra explotacion economico. E prome Cooperativa Social moderno tabata Rochdale Pioneers di Inglatera (1844), cu a establece principionan cu ainda ta guia movementonan cooperativo pa mundo den siglo 21, esta miembresia habri, control democratico (un persona, un voto), y distribucion equitativo di beneficionan.

Un otro ehempel mas recien ta Cooperativa “Mondragon.” Funda na 1956 door di Padre Jose Maria Arizmendiarrieta den un pueblo pober di Pais Basco na Spaña, Mondragon a crece di un school di trahadornan na un conglomerado internacional cu universidad, banco, fabrica, y servicionan di salud. Tur esaki a mantene e base democratico, cual ta cu e Cooperativa ta den man di miembronan di clase trahador. E principio basico: ‘Capital ta den servicio di labor — no labor den servicio di capital.’

AI pa Pueblo?

Den e vision aki, e Cooperativa Social di AI lo ofrece varios servicio na miembronan y pueblo henter na Aruba. Mi persona ta envisiona tres servicio crucial pa start cune:

1. Jurdisich Loket AI:
 Servicionan legal ta excepcionalmente costoso na Aruba. Un trahador averahe cu su salario humilde casi no por paga pa servicionan legal. Door di esaki tin un gap entre esnan cu si por paga pa ayudo legal, y esnan cu simplemente no por. Den mi vision, AI lo ser usa pa por duna servicionan legal basico pa clase trahador. Pensa disputa di contract laboral, of derecho di vivienda, formula carta huridico, y asisti esnan cu pregunta general huridico.

2. AI Budget Coach:
 E realidad di hopi famia Arubiano ta: salario ta drenta, y placa ta sali, y na fin di luna no ta keda casi nada. No pa falta di habilidad, sino pa falta di herment accesibel cu por yuda famianan den planificacion financiero. Den esaki ta envisiona un AI Budget Coach cu ta analisa entrada y gasto, y ta ofrece recomendacionnan personal.

Tambe cu un calculator di debe pa asina preveni cu famianan bay den fiansanan cu nan no por paga a plaso largo. Na final tambe cu un calculator di pensioen/inversion cu ta mustra cuanto lo por tin den bisa 20-30 aña, si spaar y inverti di manera consistente pa cu pensioen.

3. AI Tutor pa Bijles:

Tin un gap grandi caba entre mayornan cu por afford bijles y esnan cu simplemente no tin e manera financiero pa por paga un maestro di bijles. Esaki ta causa cu yiunan di famianan di menos recurso ta cay atras for di un edad jong caba, cual tin efectonan profundo a plaso largo pa e famia y full nos sociedad. Den mi vision lo crea un tutor AI cu por yuda hobennan na Papiamento cu nan lesnan concerni, manera Wiskunde, Natuurkunde, Scheikunde y Nederlands, Engels etc. Asina ta haci e gap educacional mas chikito.

En conclusion

Pa esnan interesa, diasabra dia 25 di April, 12or di merdia, Simon Waslander hunto cu Leo Yarzagaray, Aaron Bislip y mas invitadonan lo ta parti di un entrevista di radio na Hit 94FM, unda lo elabora riba entre otro e tema di e articulo aki.

“E ora a yega pa Aruba construi su propio infrastructura digital: no pa sirbi corporacionnan grandi, sino pa sirbi e pueblo trahado di nos isla. Un Cooperativa Social pa AI ta e caminda.”