Eva González ta un hoben senciyo, amabel y alegre, actualmente ta coordinador di e exposicion cu ta tumando luga na Aruba Photo Room. Recientemente el a organisa e apertura di e exposicion di potretnan aki bou e titulo: Museum A Haunted Medium.

E exposicion aki cu ta habri na Talk Of The Town (TOTT) ta conta cu Fabian Gonçalves Borrega como curator di e muestra artistico aki. Gonçalves Borrega ta curator di e Museo di Arte di America suscrito na Organisacion di Estado Americano (OEA). For di e instancia internacional aki a bin e coleccion aki cu ta na Aruba, caminda tres artista ta participa den dje: Paula Pedrosa di Brasil; Traer Scott di Merca y Andres Wertheim di Argentina.

Con ta posibel cu nos tin un coleccion di Museo di Arte di America na Aruba? Eva González a laga sa cu TOTT a firma un acuerdo cu e museo menciona pa e exposicion aki por bin na nos isla. Cada tres luna lo bin un coleccion nobo cu artistanan nobo y concepto artistico nobo. Ya caba nan tin henter un aña plania di exhibicion. E proximo exposicionnan lo tuma luga na april, juli y october 2020.

 

Exhibicion.
Pa loke ta e exhibicion actual ‘Museum A Haunted Medium’, el a splica cu e tres artistanan aki ta explora cu nan obranan e relacion entre publico y arte dor di nan propio medio. Kiermen entre loke abo ta wak y e obra cu bo ta wak. Por ehempel no ta existi restriccion pa bo touch e potretnan. Nan ta un muestra gewoon cu no ta wordo hinca den un frame. E cos aki no ta algo normal, ora cu ta trata di un exposicion di arte. Pero el a splica cu e Aruba Photo Room no ta un galeria y tampoco e ta un museo.

Nan tin pensa di bin cu e curator di e exhibicion aki pa asina e por duna un splicacion di e concepto cu ta wordo maneha riba e tipo di expo aki. Tur coleccion cu ta na Aruba, ya caba a wordo exhibi na Washington D.C. Pues nan ta coleccion cu a wordo estableci caba.

Arte sostenibel.
Di su banda, Eva González a bisa cu e concepto di Aruba Photo Room ta uno di arte sostenibel. “Nos idea ta esun di presenta muestranan cu no tin balor comercial”, el a bisa na Bon Dia Aruba.

Sinembargo e obranan ta accesibel pa esunnan cu ta interesa den dje. Si abo ta interesa pa cumpra un di nan, e obra lo bin directamente for di OEA na Washington D.C. pa bo cas na Aruba, hunto cu un certificado di autenticidad di e fotografo.

Eva a bisa cu pa medio di e arte sostenibel aki, nan kier hala atencion pa fotografonan, pero tambe artistanan di nos region Caribe y specialmente di Aruba, cu ta interesa di uza potretnan como medio, por participa den dje. Kiermen cu den cualkier forma di nan arte, nan ta inclui potretnan como medio di expresion artistico.

E intencion tras di dje ta di por crea un coleccion local, basa riba locual nos tin di ofrece artisticamente riba e tereno aki. Cu un sonrisa generoso, Eva González, a finalisa e entrevista aki positivamente bisando cu eventualmente pa un of dos aña, nan lo por exhibi un coleccion cu ta bin for di region Caribe cu contribucion logicamente di artistanan local.