Juritza De Cuba: ‘No mester forsa mucha pa bay carnaval’

Pa varios siman caba, diferente departamento ta poniendo enfasis y duna conseho pa locual ta muchanan di 0 pa 5 aña den temporada di carnaval. Nan ta pidi pa evita cualkier actividad di carnaval y mas anochi cu den dia, mirando cu pa e muchanan keda ‘laat no ta bon idea’.

Juritza De Cuba, psicologo di departamento di Asunto Social a splica tocante efecto cu por trece ora di hiba mucha carnaval. E ta afecta su rutina, perde soño ora nan bay den parada largo. E no tan bon idea ni sano pa nan. E mucha ta cansa, fada lihe pasobra e tin cu keda wak hende keda pasa.

No ta mucho diversion pa un mucha. Pa e motibo aki, e ta bisa cu tin Fundacion pa nos Muchanan, cu tin lista di crèche den cual famia por laga nan yiu. Of si no kier lag’e cerca un crèche, por opta pa un famia cu e mucha ta sinti su mes comodo. “Si no ta asina por sacrifica 1 pa 2 aña pa e bienestar di bo yiu.”

E por trece efecto na e mucha, depende na kico e ta pasa aden. Kico su experiencia tabata ora den carnaval chikito, nan ta inconsciente pero nan por wak pelea entre mama of tata. Nan por wak alcohol ta hunga un rol, anto esey por ta algo cu e mucha ta afecta emocionalmente caminda nan por haya ansiedad.

Muchanan bou di 5 aña no sa kico ta pasando, ta crea nervio, ansiedad, experiencia negativo pasobra nan ta mira tur cos y ta testigo di locual ta pasa y no ta leuk pa nan. Nan por lanta cu nervio y ansiedad.

E fundacion tin diferente partner, un di nan ta Tienda di Educacion cu tin informacion y por yama libremente. Fundacion pa nos Muchanan, Fundacion Respetami ‘tur ta para patras di e bienestar di nos muchanan’.

Mayornan por pasa na e fundacion of wak e lista riba Facebook, pa asina nan wak kico ta disponibel pa e temporada. Nan tin recomendacion, pero cada persona mes por scoge of wak cua ta e miho opcion pa laga nan yiu.

Tambe ta conta pa e muchanan cu ta mas di 5 aña, cu tampoco kier bay carnaval. De Cuba ta bisa cu no ta bon pa forsa e mucha pa bay un caminda unda e no kier bay, pasobra kisas no ta su ambiente y esey tambe por duna ansiedad cu e multitud di hende y zonido cu nan no gusta. Ora nan bira adulto por ta un experiencia negativo pa nan.

“Sigur cu si tin efecto. No ta tur mucha gusta of mester gusta carnaval. Abo como mayor ta gusta y ta kere cu nan tambe ta gusta bay, pero no mester forsa nan”, De Cuba a expresa.