Den e dianan aki nos ta cay di un sorpresa den e otro, pa loke ta maneho di varios ministerio, tur relaciona di algun manera cu e crisis actual di coronavirus. Ta parce cu e casonan aki tin como denominacion comun cu nan no ta bon pensa y cu mitar curu ta tira nan den publicidad, pa demostra, nos ta supone, cu nan ta ‘bezig’. Sin embargo, aunke publico por ta poniendo presion pa mira resultado rapidamente, esey no ta e mihor manera di traha.

Un di nan tabata e idea pa cambia ley pa haci piscamento cu harpun posible atrobe, loke despues di bastante critica a resulta den un silencio, loke no necesariamente ta implica cu a laga e plan aki pa loke e ta: algo mal cushina cu ta bay trece mas controversia cu solucion pa problema serio actual.

Despues nos ta haya e iniciativa pa habri e posibilidad pa haya tereno di huur pa bay planta. Bon iniciativa, pero e mester haya un ehecucion apropia tambe. Esey no ta conta solamente pa e registracion y emision di tereno, unda cu rapidez por pone cierto hende perde nan tereno, loke sin duda algun ta bay resulta den rencor y critica. Nos ta comprende e pensamento su tras: crea rapidez di accion pa hende por cuminsa mas pronto posible cu nan proyecto. Esey ta un banda di e asunto cu nos mester awor, pero nos no por lubida e otro. Esey ta cu nos mester tin un idea unda nos ta bay, kico nos ta bay stimula y kico no. Y ta net aki ta unda nos no ta tende nada, ni un palabra tocante un maneho agricola cu ta basa riba un analisis kico ta e cultivo y metodonan cu ta ‘make sense’ den nos clima y situacion di disponibilidad di recurso pa por realisa un proyecto exitoso.

Kico anto un maneho asina lo requeri? Promer cu tur cos un escogencia di prioridad a base di necesidad y factibilidad. Nos ta duna ehemplo, pasobra esey ta trece mas claridad. Un persona ta bin pidi tres bunder di tereno pa planta maishi cu pinda. E mester haya e tereno? Den nos concepto, no. Y promer cu tur hende cuminsa grita cu nos redaccion ta contra nos Arubianonan, laga nos argumenta. Pa cuminsa, no tin tanto tereno grandi mas cu ta apto pa agricultura tradicional. E mihornan a bay perdi caba pa construi cas (Tanki Leendert, Sabaneta, e.o.). Sin yobida faborable esaki no ta bay logra pasobra paga awa caro pa cultivo den aire liber no ta factible. Ademas, e ta un fraccion minimo di loke nos ta consumi na grano basico.

Loke ta prioridad ta e proyectonan moderno inteligente, cu ta limita efecto di solo y biento pa cultiva producto di horticultura di calidad y productividad halto, limitando consumo di awa. Esakinan por entrega e 200 gram di berdura fresco cu WHO/FAO ta recomenda pa e dieta minimo saludable pa un persona. Loke ta pasando actualmente ta cu nos ta tende solamente e propaganda di emision di tereno, pero nos no ta tende nada di un maneho coherente den e asunto aki. Por ta cu tin, pero atrobe lo ta tene esaki secreto, manera tanto otro cos. Y ta keda straña anto cu gobierno ta mustra ‘ad hoc’ y sin planificacion? A base di kico realmente ta parti tereno anto? Djis laga nos sa.

Otro asunto cu ta hala atencion ta loke ta pasando den enseñansa den e dianan aki. Confronta cu e crisis cu a obliga cera tur scol, a introduci un maneho ad hoc pa loke ta ‘haya les online’. Nos impresion ta cu henter e asunto aki ta depende enteramente di e empeño, o ausencia di esey, di e maestro y e mayor(nan). Te awor, cu e mayor(nan) tabata na cas, por a observa cu hopi mayor, apoya pa maestronan, a haci un esfuerzo pa limita e daño. No mas cu esey tampoco, pasobra e muchanan pa gran mayoria ta haya repiticon di materia so, nada nobo. Awor ta filtra e idea nobo cu esaki ta bay bira e ‘normal nobo’ cu e mayornan ta bay den e ‘driver’s seat’ pa loke ta siña nan yiunan. Nos tin basta tempo sin tende algo asina ridiculo y fuera di lugar. Y pakico? Pasobra nos ta papiando di un pais unda e participacion di hende muher na proceso laboral ta haltisimo y ademas cu e realidad cu hopi biaha ambos partner, si tin un pareha, tin mas cu un job pa tene cabez riba awa. Cu e consecuencianan di e actual crisis nos dilanti den e proximo añanan, esey no ta bay mehora tampoco.

Loke nos ta bay tin mester ta scolnan cu ta hopi mihor cu nan tabata te awe. Mehora calidad di enseñansa ta implica entre otro un mehoracion drastico di calidad di docente, y di e condicionnan den cual nan mester traha. Si no ta haci esey, anto inverti den digitalisacion di enseñansa, pa cual nos ta completamente pro, no ta bay duna e frutonan necesario. Y tuma na cuenta cu practicamente nos no tin hende ta bay IPA mas, pues di unda nan mester sali? Coronavirus a pone nos ta pensa den slogan so? Ban bolbe pa realidad.

 

LEAVE A REPLY

Please enter your comment!
Please enter your name here