Un corto circuito den ‘feeder’ di Elmar a pone WEB plat y despues Aruba completo a keda sin coriente. Esaki WEB a confirma. E causa di e corto circuito no ta conoci ainda. Un feeder ta conecta e substation cu e consumidonan. E corto circuito a sosode diabierna atardi momento empleadonan di Elmar tabata traha riba un kabel principal den e area Sero Teishi – Balashi unda tin hopi construccion andando pa caminda nobo (entre otro den cuadro di Green Corridor).
WEB a informa rond di 5 or cu lo tuma 3 pa 6 ora pa fix e problema y Aruba lo haya coriente bek. Pero bandi 6 or ya diferente bario a cuminsa haya coriente bek, manera Hooiberg, St. Cruz, Wayaca, Pavia. Algo prome cu 5.30 di atardi aeropuerto, hospital tambe a haya coriente. Mas o menos 7or e area di hotel y Noord tambe a haya coriente bek. Alrededor 10 or di anochi WEB ta anuncia cu ‘entretanto suministro di coriente di WEB pa Elmar ta 100%, awor mester finalisa suministro na e barionan cu falta’.
WEB tambe a contesta pregunta di ciudadano preocupa, manera riba e suministro di awa. Pero e disturbio grandi no tabatin consecuencia pa awa, e compania cu ta produci awa y coriente a laga sa.
