‘WEB ta den un decadencia total’

Siwa situacion web Brnobo.jpg

 Personal di WEB, mas cu 100, a protesta ayera mainta, entre otro pa motibo di e mal estado di e compania estatal aki. “E ta den un decadencia total”, presidente di sindicato SIWA Eric Hernriquez ta bisa.

Ayera den combersacion cu Bon Dia Aruba, e sindicalista ta laga sa cu den oranan di mainta tempran mas cu 100 trahado a participa den un accion pa atende algun informacion relevante pa nan prome cu nan ta inicia nan labor. E ta indica cu na momento ey tur trahadonan tabata trahando normal y completamente: “Cien porciento WEB ta trahando. Y nos ta wardando pa sinta cu gerencia”. E sindicato tabata spera di reuni ayera mes cu gerencia.

Sindicalista Henriquez ta bisa cu un otro parti grandi di nan malcontento ta e “arogancia cu nos ta haya di parti di gerencia. E ta agrega cu igualmente tin maltrato pa e trahadonan y tambe cu e sindicato.

Reunion
Ainda den ora di merdia e status di e situacion tabata cu SIWA tabata wardando pa sinta cu gerencia di WEB. Pero prome cu esey, gerencia di e compania di utilidad aki a bay sinta cu Utilities, e doño di WEB (y Elmar) cu finalmente ta den man di gobierno. Sindicato SIWA tabata wardando pa gerencia honra nan peticion pa sinta cu nan, mientras cu nan ta sigui evalua e situacion si nan mester bay mas leu riba e situacion laboral aki.

Sinembargo e ta laga sa cu no tin un ultimatum actualmente pa sinta cu gerencia di WEB. E no ta kere cu durante e fin di siman aki directamente e trahadonan lo bin cu accion ainda. Nan ta na spera y nan kier duna espacio ya cu nan ta acorda riba nos pueblo. Pero otro siman, dialuna tempran si ainda nan no lo a sostene e reunion aki, nan lo evalua internamente cual lo ta e siguiente pasonan.

Encuanto nan negociacion di nan contracto colectivo (CAO) nobo, e sindicalista a indica cu nan no a cuminsa ainda, pero nan lo cuminsa denter di un par di siman.

Igualmente el a laga sa cu sindicato a haya mandato di nan miembronan pa participa den e accion cu lo tuma luga dia 29 di september awor. E sindicalista a bisa cu esaki ta un punto cu nan miembronan mes a trece dilanti, y unanimamente tur e trahadonan presente a duna aprobacion pa “sindicato SIWA Ta presente den e manifestacion” aki.

Comentario di WEB
Ayera Bon Dia Aruba a tuma contacto cu e vocero di WEB, Asja Dongen pa asina e por trece e banda di gerencia riba e malcontento di e trahadonan. El a bisa cu na e momento ey, gerencia ta abstene di duna informacion riba e asunto aki. Sinembargo el a laga sa cu unabes cu gerencia lo reuni cu SIWA nan lo trece informacion pa prensa debidamente.

 

E pregunta keda kico e mal estado tin como consecuencia pa e produccion di awa y corienta pa nos isla. E ultimo añanan nos por ripara cu tin mas disturbio grandi cu coriente cu antes. Y aña pasa tabatin un lek grandi cu a contamina e lama rondi WEB y tambe e mangelnan. Un poco despues tabatin un lek tambe unda despues a haya hopi pisca morto. WEB a admiti despues cu nan no por haci mantencion preventivo debidamente pasobra nan no a inventarisa tur e riesgonan y tuma medida di prevencion necesario.

 

 

 

 

You May Also Like

8juliNg Angel Bermudez.jpg

Minister Angel Bermudez: Presupuesto 2017 mester wordo entrega prome cu dia 1 di september na Parlamento

Manera tur aña, como custumber, presupuesto tin cu wordo entrega. Sinembargo tin algun aña ...

img_1443553006_953.jpg

Trahadonan di parke nacional Arikok a protesta diamars mainta

ORANJESTAD – Segun nos colaborador na Noticia Cla, e trahadonan di Parke Nacional Arikok ...

Accion di entrega di permisonan cla na DIMAS diabierna awo

Riba diabierna 9 di februari, lo pone un team grandi pa haci entrega na ...

parlamento.jpg

Presupuesto 2016 aproba cu 11 pro, 10 contra

Pa un siman a tuma luga den Parlamento di Aruba e tratamento di Presupuesto ...

‘Mester cuminsa inverti mas tempo den conocemento di cannabis’

Bon Dia recientemente a combersa cu un persona experto den no solamente e anatomia ...

Cantidad Polis (1).jpg

Falta di material na Scol di Polis

Minister di Husticia ta haci bishita na scol di polis y constata cu e ...