E pandemia di Covid a produci un crisis den tur sector, te hasta riba tereno di fe. Pa clero di Aruba a bira un reto pero tambe un preocupacion, mirando cu mayoria di nos poblacion ta Catolico.

Vicario di Aruba, pastoor Andres Makowiec a declara na Bon Dia Aruba cu ta hopi importante pa mantene y tambe biba nos fe. E ta un reto pa iglesia hala nan parokianonan bek pa nan celebracion religioso. E pastoor ta positivo cu e creyentenan Catolico a cuminsa aumenta den nan celebracionnan religioso. Esta despues di e bahada drastico cu tabatin durante e prome lunanan, desde cu Covid-19 a drenta Aruba sin bati nos porta dia 13 di maart ultimo.

Sin duda tin hende cu a descustumbra di bay misa diadomingo debi cu nan tin miedo di e virus. P’esey nan a bin cu e celebracion di Santo Sacrificio di Misa online den diferente parokia rond di nos isla. Pero tin hendenan a custumbra na cierto confort di sigui e misa desde nan cas, y nan no ta bay misa at all. logicamente clero tin su preocupacion cu esaki ya cu den cierto sentido lo por a debilita of pone den crisis Aruba su fe Catolico.

El a bisa cu nan ta mira e situacion aki for di diferente angulo. Di un banda mester busca proteccion y percura pa salud di hende. Tambe nan por a wak cu na principio nan a kere cu debi na e pandemia hendenan ta bay tuma mas na serio bida spiritual, mirando e virus su efecto riba salud di hende te cu causando mortonan. “Pero nos a mira cu toch no den sentido general, sino minoria,” el a declara.

Di otro banda, Iglesia a bin cu diferente dispensacion basa na prome luga na proteccion di salud y bida. Pero nan ta wak cu e dispensa aki a pone den mentalidad di hende cu nan ta excuus nan mes pa no bay misa. “Si tin dispensa pa no bay misa diadomingo… nan a custumbra un poco pa no asisti na misa,” el a bisa.

Clero di Aruba ta mira e situacion aki por debilita nos fe y tambe descustumbra e comunidad Catolico na cierto cosnan. Vicario di Aruba, pastoor Andres Makowiec a bisa cu loke ta bin den su mente ta loke Evangelio ta papia di Santa Familia y tambe di custumber cristian.

E ta aclaria cu no ta trata akinan di un cos mecanico. Pero e ta haya cu custumber cristian ta hopi importante pa fortalece nos fe. Esaki debi cu hopi hende cu a aleha for di misa ta dispensa nan mes di nan participacion.

 

Den cuadro di celebracion di Misa di Aurora acercando pa celebracion di Pasco di Nacemento, Vicario di Aruba ta recorda e palabra di San Huan Bautista: “Prepara caminda pa Señor.” E parti mas esencial di e celebracion di Pasco ta pa drenta interior di nos curason. Pero tambe pa nos por wak nos estado personal y tambe di nos famianan, el a bisa.