Crecemento economico 2019 ta un pregunta ainda

ORANJESTAD – Durante e siman aki ekipo completo di CAft tabata na Aruba, pa varios actividad. Asina a reuni varios biaha cu ministero encarga cu finanzas, y cu conseho di ministro, diahuebs anochi prof. Raymond Gradus, presidente di CAft, a duna un charla pa un audiencia bastante grandi , y ayera atardi a duna un rueda di prensa na sede di CAft.

Tanto den e rueda di prensa como den e charla di diahuebs, a bin dilanti e tema di e crecemento sumamente fragil di nos economia den e ultimo añanan. Durante e rueda di prensa Bon Dia Aruba a puntra kico e organo consehero ta pensa di e tendencianan economico cu ta aparece den e cifranan cu Banco Central a publica recientemente, di diferente entrada di gobierno, cu por indica desaroyo positivo o negativo di economia. Loke Bon Dia a mustra ta e entradanan menos positivo di BBO/BAVP, impuesto riba cambio di divisa, y accijns riba combustible, alcohol y tabaco. Especialmente e entradanan di BBO/BAVP, aumenta na juli 2018 di 1.5% pa 3%, no ta mustra cu loke e drenta caha di gobierno ta loke por a anticipa. Un señal cu e aumento di e impuesto aki ta ‘comiendo su mes’ pasobra sin crecemento sustancial economico, e suma disponible pa consumo local no ta crece, y cu 6% na lugar di 3% pa paga na caha, ta logico cu e entrada total di BBO/BAZV den di dos parti di aña ta menos cu por a spera.

Prof. Gradus a evadi un contesta directo riba esaki, bisando cu mester consulta cu Banco Central pa nan bisa kico lo ta e resultado final pa 2018 di crecemento economico real y nominal, pero den su presentacion di diahuebs anochi na Hilton Hotel, ta aparece un cifra di GDP real pa 2018 di mas o menos -0,5% (mira grafico acompañante). Esaki lo ta basa riba un crecemento nominal di algo mas cu 2%, cu a desaparece por completo pa motibo di e inflacion cu lo ta poco mas di 3% pa 2018.

Banco Central den su ultimo Economic Outlook di april 2018 a baha e crecemento anticipa pa 2018 di 2,7% real, pa 0,3%. E version di Outlook ey tabata bisa tambe cu no a procesa den esaki e ultimo medidanan di gobierno cu tabatin na vista pa mita di 2018, cu tabata entre otro e aumento di BBO/BAZV/BAVP di total 3% pa total 6%.

Gradus mes a confirma anto cu no tabatin crecemento real na 2018, y cu e GDP real a resulta den un reduccion di alrededor di -0,5%. Sin embargo, Gradus no tabata kier a haci ningun comentario riba e perspectivanan economico pa 2019, salvo cu el a referi na e prognostico di Banco Central, cu gobierno ta comparti, di un crecemento di 1% di GDP real.

E pregunta ta keda, si mira e resultadonan menos faborable pa 2018, kico 2019 lo trece. Pa haya sa esaki lo mester warda e prome cifranan indicador pa 2019, cu lo ta e rapport financiero di prome kwartaal di 2019 cu por spera den di dos mita di april.

 

You May Also Like

Venezolanonan a participa masalmente den consulta popular

Ayera for di oranan di mainta tempran prome cu e consulta popular Venezolano a ...

stephanie arends 4.jpg

“Si Aruba kier su studiantenan bin bek, e mester cuminsa scuchanan”

– Si Aruba kier su studiantenan bin bek e mester cuminsa scuchanan, E hoben ...

Master Plan riba desaroyo di tereno di waf no ta aproba ainda

Director di APA (Aruba Ports Authority), Jossy Figaroa ta splica na Bon Dia Aruba ...

prijs gasolin.jpg

Prijs di gasolin ta subi cu 1.4 cent

Entrante 13 di juli 2016 e prijsnan di benta di productonan petrolero lo cambia. Esaki ...

Urirama lo no haya parke molina y 17 miyon florin extra pa crisis social

Durante tratamento di presupuesto 2018 den parlamento prome minister Evelyn Wever-Croes (MEP) a declara ...