Presidente interino di Hospital Horacio Oduber ta comparti opinion di trahadornan den sector di cuido, kendenan a bati alarma tocante e situacion critico a raiz di pandemia di Covid-19. Sinembargo, el a destaca cu e unico hospital di Aruba tin un otro crisis: un deficit di miyones.

“E hospital ya caba tin algun aña di problema financiero. Kiermen nos no tin reserva, solamente debe pa handle e tipo di fluctuacion asina”, Freek Korver, presidente interino di directiva di hospital, a bisa reportero Sharina Henriquez di portal Ret Caribense.

Cu fluctuacion ta referi na e cuido di e cantidad di pashent cu Covid-19, cual nos a mira ta continua den aumento durante e segundo ola di brote. Pero tambe e reduccionnan den presupuesto di hospital, a raiz di condicionnan mara na e prestamo pa sosten di likides cu Hulanda a duna Aruba.

Empeorando e situacion ta e cantidad di incidente y calamidad cu hospital a pasa aden durante ultimo aña, cual Korver a describi como ‘un sorto di Murphy’s Law’: “Tur loke bo por imagina bo di mas straño posibel, el a sucede den un aña.” El a referi aki na e hacking di sistema di computer na november ultimo, y tambe e candela na juni cu a revela asbest den dak.

E incidentenan aki a produci listanan largo di espera, segun Korver. “E listanan di espera, cu hende mester warda mas largo prome cu tratamento cuminsa, esey si ta algo. Y si tin hende tin keho tocante esaki, mi ta compronde tambe y lo ta nos profesionalnan tambe ta haya teribel. Y loke como director di un hospital, mi tambe ta haya teribel. Naturalmente mi lo prefera si, cu nos capacidad, nos por a duna cuido normal. Pero actualmente nos no por.”

Haciendo referencia na e carta cu dos siman pasa personal di cuido a manda, den cual a expresa preocupacion cu e reduccion di gasto den sistema di salud ta conduci na un reduccion den calidad di cuido, Kover a duna comentario kico lo pasa si bolbe reduci e suma di placa disponibel pa hospital. “Kisas nos por pospone pago di nos acreditadornan y suministradornan un luna ainda. Pero si esaki dura mas largo, no mas. E ora ey si mester scoge”, el a declara, insinuando cu hospital lo mester scoge ki material of servicio ta stop di paga.

Durante e prome reduccion di gasto hospital a baha salario di empleadonan, pasando e reto aki na su trahadonan, cu ya ta bao presion tratando e cantidad grandi di pashent di Covid-19 y di otro malesanan.

Mientras tanto, gobiernonan di Aruba y Hulanda ningun a duna un reaccion riba e carta urgente di e trahadonan di salud. “Casi diariamente mi ta bati alarma na VWS (ministerio di Salubridad di Hulanda). Nan tambe ta preocupa pa e continuidad di cuido na e isla. Pero nan mester deal tambe cu BZK (ministerio di Relacionnan di Reino), cu den cuadro di sosten di likides, kier haci otro palabracionnan tambe”, segun Korver a bisa Ret Caribense. BZK ta responsabel pa e condicionnan mara nan sosten di likides, entre nan, cu AZV reduci su gasto cu 5 miyon florin cada luna pa un total di 35 miyon. AZV ta paga pa cuido medico pa pueblo, entre otro na hospital.

Contestando pregunta di Ret Caribense si ainda hospital tin e situacion bao control, mirando e segundo ola di Covid-19 cu trece un aumento enorme den cantidad di caso, Korver a bisa cu ainda tin suficiente capacidad. “Tin hende a bin extra for di Merca y cu esaki nos por aumenta bay 20 cama den ICU… Pero e ta pidi hopi si di nos organisacion.”

Maske segun Korver door cu e pashentnan ta relativamente hoben y ta cura y sali di hospital mas lihe, ‘si e cantidadnan sigui subi mucho hopi y [e infectadonan] bira mas bieu, si, nos tambe tin nos limitenan’.

LEAVE A REPLY

Please enter your comment!
Please enter your name here