Cristiannan sea alerta pa eleccion 2017

Eric Alvin Conrad Ras (CURPA)

Nos tur por observa e desaroyo di e campaña politico pa eleccion benidero. Partidonan cu ta purba di midi forsa cu otroy caminda ta ser usa tur clase di strategia y tactica pa conbense e votadornan pa deposita nan confiansa ariba nan partido. Nos como cristiannan no por perde for di bista e realidad cu ta tumando lugar dilanti di nos wowonan. Hopi biaha fanatismo politico ta hasi hopi hende perde e nocion di e realidad di hopi asuntonan importante pa futuro di un pais. Esaki ta conta tambe pa nos dushi isla di Aruba. Tanto catolico como otro nominadonan,cristiannos tin e tarea cu ta sumamente importante pa e eleccion di dia 22 di September 2017 pa pone representantenan digno di pueblo den Parlamento cu lo tin bienestar y futuro di nos pais como prioridad.Un di e puntonan hopi importante cu nos tin cu tene cuenta cune como cristiannan ta e formacion y desaroyo moral di nos juventud na schoolnan.Nos tin cu vigila pa no tin mas metemento di parti di gobernantenan cu ideanan liberal y anti principionan di Dios den nos enseñansa.

Ta fresco den nos memoria cu riba 8 di september 2016 a ser aproba un amienda den Parlamento di Aruba cu ta regarda entre otro derechonan di parehanan di mesun sexo den un matrimonio y tambe legalisa e bibamento hunto sin cu ta casa.

Un aprobacion cu a wordo duna den parlamento dor di partidonan MEP, AVP y Partido Democracia Real kende su lider awe ta postulando su mes ariba lista di partido POR. E amienda  conoci como amienda 7 ta un parti masha chiquito den e ley di Codigo Civil nobo cu proximamente mester drenta na vigor ora cu e wordo aproba den nos parlamento pa medio di e “Invoeringsverordening”. Nos Codigo Civil ta consisti den 8 buki y tin como 800 articulo cu a  wordo cambia. Siguramente e ley aki lo bai parlamento despues di eleccion paso e ta un batata cayente pa e partido politiconan cu a vota pro. Cu siguransa nan lo bisa e amienda 7 aki ta un parti masha chiquito di nos Codigo Civil nobo no ta mira pakiko vota CONTRA di e “INVOERINGSVERORDENING”.

E sentencia di Corte Europeo ta papia cla cu ningun pais por wordo forza pa accepta e matrimonio di mesun sexo paso e NO ta un derecho y tambe mester tene cuenta cu e cultura di e pais. Den e caso aki gran parti di e e habitantenan di ARUBA ta cristiannan catholico y otro nominadonan cristian.E palabra di Dios ta si y amen y nunca e palabra di Dios ta bai contra di su principionan y bienstar di Su pueblo.

Nos por corda cu na aña 2013 prome cu eleccion tabata wordo papia cu lo no hisa edad di pensioen pa 65 aña. E prome cos cu e gobierno cu a sinta despues di eleccion a hasi ta hisa edad di pensioen na 65 aña. Wel wel esaki tambe lo ta e caso cu ora e gobierno nobo sinta y cu no tin voz di e mayoria di e pueblo katholiconan cristian y otro nominadonan cristian lo hasi, ta pasa e “INVOERINGSVERORDENING”.

Esaki ta un tactica cu gobierno nobo cu sinta lo hasi paso pa e siguiente eleccion tur hende ya a lubida caba di e puñal cu nan a pasa e pueblo cristiannan katholicoy otro nominadonan cristiancu ta forma e MAYORIA di e pueblo di ARUBA. Den e Codigo Civil Nobo tambe tin para tambe cu por deshereda un yui pero e partner si no por wordo deshereda.Kiermeen asta un yui por perde su derechonan. Inmaginabo bo mesun sanger bo por deshereda. Ta bisto cu ningun partido politico kier toca e tema aki paso lo e ta un clabo riba nan caha di morto den e proximo eleccion. E introduccion di e ley aki no solamente ta bai contra di principio di Dios pa cual gran parti tambe  ta contra di e principionan cu e pueblo di Dios aki na ARUBA ta para pe. Si antes ora cu bo casa bo ta haya cierto derecho nan awor ta miho bo biba hunto paso bo tambe tin mesun derechonan. Esaki ta un forma di libertinahe y tambe ta pa destrui locual cu Dios a crea esta e matrimonio.

Leynan a wordo traha pa proteha nos matrimonio cu ta consisti di hende homber y hende muhe.  Nos no mester lubida cu esaki tambe lo habri e caminda pa tur sorto di ley cu ta bai contra principionan di Dios. Partido Curp@no ta contra di ningun hende y no ta descrimina ningun hende pero si ta contra di tur ley cu ta bai contra e principionan di Dios. Nos di partido Curp@ ta para pa no derechonan.

Nos ta na caminda pa un desastre si ta asina nos kier sigi.No solamente AVP cu ta jama su mes un partido cristian democrata, pero MEP y PDR (Democracia Real) tambe a bai di acuerdo pa duna e comunidad cristian na Aruba un cara abou dia 8 diseptember  2016 cu e aprobacion di e amienda 7 cu ta un parti masha chiquito di nos Codigo Civil den Parlamento.Esaki ta djies ta e comienso.E pueblo Arubano lo mester juzga pa su mes si nan lo por deposita nan confianza e partidonan tradicional aki cu na principio a bisa No y despues a bisa Sina momento di berdad. Lo bo sigi kere den hendenan asina? Lo bo sigi deposit abo confiansa den nan? Paso prome cu e amienda 7 a wordo presenta den parlamento di ARUBA nan a vocifera cu nan lo vota CONTRA pero den parlamento nan a traiciona e pueblo cristian katoholico y e otro nominadonan cristian door di vota PRO.

Nos por corda riba e marcha di senjora Hacintha THIJZEN TRIMON contra di e ley aki y tambe ora cu e cristianan katholico y otro nominadonan Cristian a uni y a pone mas cu 800 hende den un corto tempo riba pia contra un aprobacion di parlamento cu ta bai contra di e matrimonio Dios a institui. Sin e union di e homber cu e muhe hopi di nos lo no ta existi awe. Tampoco nos lo por permiti pa otro bisa nos yuinan cu no a nase homber of muhe y nan lo mester dicidi cu tempo kiko nan kier ta. Si nos bai contra principionan di Dios  ta spera nos enfermedad, miseria y destruccion paso unda un pueblo no ta agrada Dios Dios ta kita su bendicionnan. Ami ta scohe pa e bendicion di Dios y no e maldicion, mi ta prefera prosperidad y no ruina, salud y no enfermedad.

Den e eleccion di 22 di september 2017 e decision ta den nos man si nos kier salbaguardia nos principionan como un comunidad cristian akina ARUBA y no laga partidonan politiconan tradicional bin cu promesanan falso y pa despues dal bo un puñal den bo lomba. Digno y culto pueblo di ARUBA ta di suma importancia ken lo goza di bo confianza  pa defende e principionan cu bo como pueblo ta kere aden  y como pueblo bo ta considera digno di bo representacionden parlamento despues di eleccion di dia 22 di september 2017. Dia 22 di september 2017 e portlood punta corra ta den bo MAN pa dicidi ken lo ta digno di bo confianza.

Pesey mi ta pidi e pueblo cristian di Aruba cu ta MAYORIA duna nos di partido CURP@ e confianza y sosten pa nos por para pa normanan y balornan di un pueblo cristian y cu tur otro partido a laga cai.E palabra ta bisa: miho bo tin temor di Dios cu bo tin temor di  hende. Dios ta stima e hende pero no ta stima su picanan.

 

You May Also Like

Dangui Oduber di MEP adoptando vision di Gobierno di AVP

Parlamentario di fraccion di AVP, Marlon Sneek ta mustra sumamente contento cu colega di ...

Arthur Vallejo no a huramenta pero el a bira e di nuebe minister

Un biaha mas e lider di fraccion di oposicion di AVP, Marlon Sneek a ...

Parehanan LGBT mester haya derecho pa casa na Aruba?

Tur siman nos ta publica e resultadonan di un poll riba un ponencia hunto ...

‘Gobierno nobo ta trahando pa yega na trankilidad y normalidad entre Aruba y Venezuela’

Durante conferencia di prensa di Gobierno di Aruba, minister Xiomara RuizMaduro a splica riba ...