Comerciante Uni Aruba (CUA) ta expresa preocupacion tocante e intencion di gobierno pa aumenta salario minimo y relacion’e cu bestaansminimum, advertiendo cu esaki por afecta sector comercial, empleo y costo di bida. Durante un conferencia di prensa, Francis Saladin y Frans Ponson a critica e manera cu gobierno ta manehando e proceso y a enfatisa e necesidad di un dialogo social cu sindicato y gremionan comercial.

Segun e representantenan di CUA, sector comercial ta reconoce cu poder di compra di pueblo a deteriora y cu ta necesario pa busca solucion pa yuda famianan cu ta enfrentando dificultad financiero. Sinembargo, nan ta considera cu aumento di salario minimo no ta necesariamente e solucion mas efectivo si gobierno no atende simultaneamente e factornan cu ta contribuyendo na costo di bida halto.

Saladin a indica cu gobierno ta pone demasiado enfasis riba responsabilidad di comerciante, mientras cu diferente impuesto y aumento di tarifa di servicio publico tambe ta contribui na costo di bida. Como ehempel, el a menciona BBO, BAVP y BAZV, señalando cu nan efecto acumulativo ta representa un carga grandi riba prijsnan di producto y servicio.

El a compara e tarifa di 1.5% cu awor a subi na 7% y cu, segun el a señala tin un carga acumulativo 14%. El a splica cu, riba un compra di 100 florin, e diferencia ta entre 1.50 florin y 14 florin, ilustrando asina e impacto di impuestonan riba costo di bida. Segun e, gobierno mester reconoce su propio contribucion na e aumento aki, en bes di pone e responsabilidad principalmente riba sector comercial.

Saladin a menciona tambe aumento di gastonan relaciona cu desperdicio, impuesto di tereno y awa. El a indica cu impuesto di tereno a aumenta cu aproximadamente 50% y tarifa di awa cu 25%. El a cuestiona cu diferente medida presenta anteriormente como temporal cu a keda vigente, aumentando asina e carga financiero di empresa y famia.

El a enfatisa cu cada aumento di impuesto of tarifa ta representa un gasto adicional cu empresanan mester absorbe of incorpora den nan prijsnan. P’esey, el a considera cu no ta realistico pa spera cu sector comercial lo sigui carga aumento di gasto indefinidamente sin consecuencia.

Un di e preocupacionnan principal di CUA ta e posibilidad cu gobierno lo aumenta salario minimo y relacion’e directamente cu bestaansminimum. Segun Saladin, costo di personal ta representa un di e gastonan mas grandi di mayoria di compania, particularmente empresanan chikito y mediano.

El a splica cu un aumento considerable di gasto salarial por obliga comerciante pa subi prijsnan of reduci personal. Segun CUA, un aumento di prijs por reduci e beneficio di salario mas halto, mientras cu reduccion di personal por afecta empleo y ingreso di famianan. Saladin a adverti cu esaki por crea un ciclo di aumento di salario y prijs, sin un mehoracion duradero di poder di compra.

P’esey, CUA ta considera cu gobierno mester concentra tambe riba reduccion di bestaansminimum mediante medidanan cu ta baha gastonan esencial di poblacion.

Un di e proposicionnan presenta ta reduccion of eliminacion di BBO riba productonan di prome necesidad. Segun Saladin, esaki por representa un manera directo pa alivia e carga financiero di consumidor, particularmente famianan cu ingreso limita.

El a argumenta cu gobierno ta dispone di diferente herment fiscal pa influencia costo di bida y cu un dialogo social por permiti pa identifica solucionnan cu ta distribui e responsabilidad entre tur e partinan involucra.

Durante e conferencia di prensa, presidente di CUA, Frans Ponson a enfoca riba e proceso di dialogo social y a rechasa e impresion cu gremionan comercial no ta dispuesto pa participa den discusionnan cu gobierno.

Segun Ponson, sector comercial a participa den preparacionnan y a entrega proposicionnan, pero gobierno a anuncia decisionnan importante prome cu e dialogo a produci un acuerdo.

El a splica cu diferente gremio comercial a designa tres representante pa participa den e proceso, incluyendo su persona. El a menciona cu dia 22 di maart a ser manda un carta identificando e representantenan, mientras cu dia 16 di april e gremionan a entrega nan puntonan pa consideracion di gobierno.

Ponson a indica cu e intencion di un dialogo social mester ta pa gobierno, sindicato y gremionan comercial presenta nan posicionnan, evalua diferente proposicion y busca un acuerdo cu ta tene cuenta cu interesnan di tur e partidonan.

Ponson a critica cu gobierno a anuncia su intencion pa relaciona salario minimo cu bestaansminimum den tres aña, sin cu e partidonan a yega na un acuerdo. Segun e, un dialogo social mester brinda tur e partidonan oportunidad pa influencia e decision, en bes di solamente presenta proposicionnan pa compensa e consecuencia di un medida cu ya a ser determina.

El a enfatisa cu CUA no ta exigi gobierno acepta tur proposicion di sector comercial, pero si cu nan ser considera seriamente durante e proceso di tumamento di decision.

Ponson a indica cu sindicatonan tin e responsabilidad di defende interes di trahadornan, mientras cu gremionan comercial ta representa dunadornan di trabao y empresanan. Sinembargo, el a considera cu e interesnan aki por ser combina mediante un acuerdo cu ta beneficia henter economia.

Otro preocupacion presenta ta e impacto financiero di un aumento significativo di salario minimo. Ponson a menciona un scenario den cual costo total mensual di un empleado cu salario minimo por acerca 3.600 florin, incluyendo obligacionnan adicional di dunador di trabao.

Segun e, e consecuencia no lo limita na empresanan cu actualmente ta paga salario minimo, pasobra otro companianan tambe por enfrenta presion pa adapta salario di nan personal.

Ponson a adverti cu microempresanan y companianan mediano por ta particularmente vulnerabel, considerando cu hopi di nan ta opera cu margen financiero limita.

El a menciona cu cierto empresanan di servicio ta depende principalmente di personal pa nan operacion. Den e casonan aki, un aumento considerable di gasto salarial por pone presion directo riba nan capacidad pa mantene empleo.

Segun Ponson, ta importante pa gobierno considera cu sector comercial di Aruba no ta consisti solamente di hotel y companianan grandi, sino tambe di un cantidad considerable di negoshi chikito cu ta contribui na empleo y actividad economico.

El a enfatisa cu si gastonan operacional sigui aumenta, prijs di producto por sigui subi, causando cu un trahador ta gana mas placa nominalmente, pero no necesariamente ta dispone di un miho poder di compra.

CUA ta considera cu tin otro medidanan cu por contribui na reduccion di gastonan mensual di famianan. Entre esakinan, Ponson a menciona revision di impuesto riba cuminda, subsidionan di electricidad y e manera cu gobierno ta distribui ayudo financiero.

El a argumenta cu subsidionan general no necesariamente ta beneficia principalmente e personanan cu den mas necesidad. El a indica cu gobierno por evalua posibilidadnan pa dirigi mas recurso na famianan cu ingreso abao, en bes di distribui cierto beneficio na tur hende independientemente di nan situacion economico.

Ponson a referi na reparatietoeslag como ehempel di un beneficio cu, segun su opinion, por ser distribui di manera mas dirigi pa logra un impacto social mas grandi.

Otro proposicion importante di CUA ta mehoracion di transporte publico. Segun Ponson, un sistema confiabel y accesibel por reduci gasto di trahador y famianan cu actualmente ta depende di transporte priva pa yega trabao, scol y otro destinacionnan.

El a enfatisa cu transporte publico eficiente por contribui na reduccion di gastonan relaciona cu combustible y mantencion di vehiculo, mientras cu tambe por facilita mobilidad di studiante y trahadornan.

Ponson a cuestiona tambe si gobierno ta dedica suficiente atencion na e posibilidadnan aki como parti di un strategia mas amplio pa mehora poder di compra.

Ambos representante a expresa preocupacion tocante e velocidad cu gobierno kier implementa cambionan economico importante. Segun nan, decisionnan cu por afecta prijs, empleo y stabilidad di empresanan mester ser basa riba analisis cuidadoso di nan consecuencia riba corto y largo plaso.

Nan a enfatisa cu Parlamento tambe tin un responsabilidad importante den evaluacion di medidanan cu eventualmente por rekeri cambionan legislativo.

CUA a reitera cu su posicion no ta contra aumento di bienestar di trahadornan, sino contra implementacion di medidanan cu, segun e organisacion, por crea presion adicional riba costo di bida y sector comercial.

E organisacion ta insisti cu gobierno, sindicato y gremionan comercial mester sinta na mesa pa identifica solucionnan structural cu por mehora poder di compra, reduci gastonan esencial y proteha stabilidad di empleo y actividad economico na Aruba.