Diabierna mainta e organisacion Comerciante Uni Aruba (CUA) a tene un rueda di prensa pa asina trece pa dilanti algun punto di preocupacion di parti di e gremio comercial. Un di e puntonan aki ta e reciente anuncio di aumento di tarifa di awa y coriente. Vice presidente di CUA, Francis Saladin a elabora ariba e punto aki y e efectonan cu e tin no solamente pa comercio, pero pa henter comunidad.

Saladin a indica, manera ta conoci, e anuncio aki ta algo cu luna pasa caba a sali den noticia. WEB y Elmar a anuncia e aumento di tarifa, pero Gobierno di Aruba mes a para esaki. Pero el a remarca cu segun locual CUA por a compronde ta cu for di cuminsamento di aña caba gobierno a haya e aviso cu eigenlijk lo mester a subi e tarifanan aki.

“Nos ta compronde cu en realidad ta dificil pa premira futuro, ta dificil pa premira cu covid of guera of kico cu ta lo afecta costo di bida, nos tin full comprension pa esey. Pero p’esey bo tin e profesionalnan cu ta maneha bo empresanan y bo ta suppose di tin confiansa den nan y no actua a base di politica solamente, no actua a base di voto solamente”, el a bisa.

Segun Saladin ta splica, si a implementa e aumento aki for di principio di aña, kizas aworaki no lo mester a aumenta e tarifa di un forma asina drastico pasobra pa nan, como comerciante, e ta algo “hopi espantoso”. El a subraya cu e situacion di algun empresa ta den un estado delicado, na unda cu tin cifranan ta hasta den negativo, pakico ta aumenta aworaki e tarifa di coriente cu 24% y tarifa di awa cu 27%.

“Imagina bo pa pueblo y pa comercio con duro e sla aki ta”, el a agrega. E vice presidente di CUA a sigui splica cu mester compronde cu ya caba e aña aki tin inflacion den tur aspecto, pa tur hende e costo di bida a subi drasticamente y aworaki cu e aumento di awa y coriente e golpi ta hopi mas fuerte.

El a enfatisa cu pueblo y comercio ta sufriendo caba cu e situacion alrededor di Covid y aworaki e efectonan pisa di e guera na Ucrania, pakico gobierno ta warda te na ultimo momento y tuma un decision asina abrupto cu ta un shock pa pueblo y comercio.

El a agrega cu a subi dianan di vakantie pa empleadonan inesperadamente, algo cu empleadonan ta disfruta di dje sin duda, pero di otro banda, el a resalta, e cosnan aki ta gastonan adicional pa empresanan y aworaki mester agrega e aumento drastico di awa y coriente tambe.

“Nan ta acusa nos di abusa, pero ken ta abusa en realidad. E ta imposibel cu nos den comercio por adapta nos prijsnan asina pasobra si nos mester adapta nos prijsnan na e costo operacional cu tin actualmente, nos tampoco no lo bende.”, Saladin a bisa. “Nos ta compronde cu e consumidor su cartera ta preta caba, pero abo como gobierno si ta haci y deshaci na bo kier, klap nos manera cu bo ta desea y despues bo ta reclama nos y bisa bin sinta den mi stoel, awel e ora mi ta bisa tambe abo bin sinta den nos stoel y bisa nos con nos ta suppose di sobrevivi den e situacion actual aki”,

Saladin a subraya tambe cu ta hopi importante pa pueblo realisa cu e sector di comercio tambe ta para hunto cu pueblo den e situacion aki pasobra di un dia pa otro e gastonan ta subi y ta dificil pa tanto pueblo y comercio sigui absorbe tur e aumentonan cu tin.

No ta un secreto cu e situacion di inflacion tin algun tempo caba andando y contestando pregunta di prensa presente, tocante pakico e gremio di comercio no a reacciona mas trempan ariba tur esaki, Saladin a indica cu nan a sali reacciona. El a splica cu tempo di e situacion di flete, nan a sali splica gobierno e situacion cu por afecta e consumidor y como comercio, el a remarca, nan semper ta presenta idea- y solucionnan pa yuda gobierno pa reduci gasto. “Den e caso ora a bin inflacion pa cu e prijsnan di producto nos a bin cu ideanan creativo tambe”, el a comenta.

Frans Ponson, presidente di CUA a agrega tambe cu pueblo mester corda cu e inflacion di awa cu coriente, e pueblo ta hay’e direct, pero e ta bay sinti e efectonan via di e comerciante tambe, kiermen pueblo lo sinti e impacto dos biaha pasobra e comerciante su prijs di awa, coriente, gasolin tambe ta subi. “Nos ta lubida riba esey. Nos ta trece e preocupacionnan aki pa dilanti y si nos no atende cu e cosnan aki, e inflacion ta bay ta gewoon absurdo”, el a indica.

Saladin a toca e punto di energia renonbabel. El a menciona cu e maneho actual ta permit comercio pone maximo 100 kilowatt di solar panels y residencial por pone 10 kilowatt. El a enfatisa cu mester cuminsa bin cu ideanan creativo y solucionnan pa yuda baha e gastonan cu ta aumentando drasticamente.

“Esaki ta algo cu bo por haci directamente pa pueblo pa yuda nan pasobra e solo cu e biento ta gratis. Nos por probecha di esey mas, duna nos mas libertad pa por haci mas uso di energia gratis ey cu ta existi en bes di abo bin suta nos cu e porcentahenan aki. A bira ora pa nos cuminsa mira esaki como un opcion pa yuda alivia e peso ariba pueblo y comercio”, el a bisa.

LEAVE A REPLY

Please enter your comment!
Please enter your name here