Despues di a lesa e titulo, mi ta sigur cu bo tin un idea di con e ladron di pan aki por mustra, pero sigui lesa, y lo bo haya un gran sorpresa, mescos cu e famia aki.

Laga mi conta bo con e ladron di pan aki a yega na nos cas. Semper nos tabata un famia cu a gusta tin mascota. Nos prome mascota tabata un Chihuahua yama Winky. Eventualmente, nos Winky stima a bay laga nos y nos a haya otro Chihuahua yama Benjamin, of Benji manera nos tabata yam’e di cariño.

Poco despues cu nos a haya un coneu cu nos a yama Frisbee, un amistad di mi mester a muda for di e pais, y el a dicidi di regala nos su coneu, ken tabatin e nomber Sir Maple. Nos a crea hopi memorianan amoroso y valioso cu nos dos coneunan, te cu a yega e dia cu nan a bay laga nos, y un biaha mas nos tabatin Benji so na cas. Sintiendo un bashi, door cu nos a custuma di tin varios mascota, Kimmy y Archibaldo, conoci di cariño como Archi, a yega nos cas.

Tristesa a bati porta un biaha mas, ora cu ambos Kimmy y Archi a bay laga nos, y poco despues, un cacho a causa cu Benji tambe a bay laga nos. Nunca nos a custuma cu un cas bashi y e silencio cu tabatin den cas. Coincidentalmente, dos di nos bisiñanan su cachonan tabata na estado, y a duna luz na mesun tempo. Asina nos a haya nos miembronan di famia nobo, Storm, un mix di Fila y Pitbull, y Zoe, un mix di Shi Tsu y Chihuahua, 2 aña pasa.

Despues di un dia largo, mi mama a saca un tempo pa e por bay haci su compras pa e luna na Pricesmart. Semper nos tur na cas ta bira contento, paso ora cu mami bay Pricesmart, e ta bin cas cu no solamente cosnan necesario pa cas, sino tambe e ta bin cas cu hopi cos dushi, y nos faborito, e pan ‘baguette’ di Pricesmart.

Manera ta custumber, mi mama a pone e pan riba mesa, y a sigui warda tur e compras nan. Diripiente, nos ta tende mi mama ta yama nos, ora nos a baha trapi, el a puntra “ken di boso a bay cu henter e pan?”, ami y mi dos rumannan a bira wak otro confundi, y mi mama a bolbe puntra “ken a bay cu e pan?”, nos tur 3 a contesta cu ningun di nos a bay cu e pan. Nos a cuminsa busca rond di cas, te hasta den bahul di auto buscando e gran pan perdi. Eventualmente nos a rindi, y a declara e pan of lubida na Pricesmart, of perdi, of horta.

Ora cu nos a ripara cu e cachonan tabata hopi keto, mi a bay pafo di cas pa wak unda e cachonan ta. Pa mi sorpresa, mi a bini ta resolve e misterio di e pan perdi, pues e gran ladron di pan tabata Zoe su ruman, Storm!

 

Bo tambe kier comparti un storia di bida di bo mascota cu nos? Manda un e-mail na noticia@bondia.com of entrega bo relato personalmente na nos oficinanan na Weststraat 22.