Sindicato STA a reuni cu su miembronan trahando na NV Elmar Diabierna mainta paden mes na Elmar relaciona cu negociacionnan riba CAO entrante 12 di Augustus 2022 cu lo mester drenta na vigor pa comienso di 2023.

E sindicato ta haya cu tin chens cu e negociacionnan aki ta bay pega pasobra tin cosnan pasando cu ‘ta hole stinki.’ Nada a wordo presupuesta pa contracto colectivo locual sindicato STA ta lamenta masha hopi mes y aparentemente e ta un modus operandi cu ta wordo aplica pa hopi tempo caba segun STA.

Sr. Diego de Cuba di Sindicato STA ta splica cu miembronan a bin wordo informa cu di parti di gerencia nan ta carece di duna e informacionnan necesario pa loke ta e negociacionnan cu mester bay tuma luga. Un di e puntonan importante cu lo tin di e negociacion aki unda a compronde for di un compania cu ta bezig ta haciendo un re organisacion yudando Elmar cu un structura salarial completamente nobo pa cu e trahadonan. Loke ta pasa ta cu conociendo e hendenan di e compania aki cu ta wordo contrata pa e tipo di trabaonan aki segun sr. De Cuba, e cos ta ‘hole stinki’ pasobra: “gerencia a trece pa nos pa dilanti cu 70% di empleadonan trahando na compania di NV Elmar ya lo ta den nan maximo caba,” segun sr. De Cuba. Kico esey ta encera cu practicamente bo ta ‘morto’ segun sindicato STA, pasobra si por ehempel bo tin 45 aña, cu e structura salarial nobo aki ya bo ta den bo maximo caba of por ta bo a pas’e mes caba. Pues si bo tin 45 aña bo tin cu keda pasa den duro pa 20 aña te ora yega edad di pension cu e salario aki, cual ta algo frustrante.

‘A laga costo di bida cay’
E trahado na NV Elmar di e forma ki no lo bay sinti ningun estimulo pa bin trabao cu algo asina ki, y esaki ta algo cu sr. De Cuba bao ningun circumstancia no por bay accepta. Tambe a trece pa dilanti cuanto placa tin pa negocia, sea bo tin un miyon, cinco shen mil etc pa no mester cuminsa na cero – e compania a laga sa cu nan no tin nada presupuesta. “Nos ta haya esaki algo masha straño mes pasobra bo sa bo ta drentando negociacion pa CAO anto bo no tin nada presupuesta pa esaki, e ora kico kier negocia cu ne?” Esaki ta e pidanan fastioso di loke a trece pa dilanti na e miembronan y splicando nan tambe cu e contracto colectivo firma anteriormente pa e otro sindicato, caminda e otro sindicato a wordo ‘changa’ , a saca cierto beneficio di e contracto colectivo cu aworaki sindicato STA tin di bay bringa pa hinca nan bek aden. Un di esakinan ta e costo di bida cu nan a lag’e cay. Revisando e contracto colectivo, STA ta bisa cu ta imposibel con un sindicalista por a laga un punto asina importante cay anto kico lo ta e motibo ta desconoci. Ora ta negocia pa CAO, mester lesa articulo pa articulo paso tin ora gerencia ta tuma bo haci tambe segun sr. De Cuba anto si bo no ta spierto di mas, nan ta pasa bo un fast ball.

‘Durante negociacion hopi cos por pasa’
Tambe tin division den Elmar caminda tin dos sindicato, y STA tin e mayoria. E pregunta ta awor kico ta pasa si un sindicato bay di acuerdo anto e otro no. Logicamente e sindicato cu tin representacion mas grandi ta esun cu tin e bos. “Pero den e caso aki nos ta tene cuenta cu tur trahado tambe y nos a bisa desde principio cu STA ta un sindicato cu ta sinta negocia CAO, y nos no ta firma ningun CAO tanten cu no tin mandato mayoritario di nos miembronan. Es decir cu ora nos caba negocia cu nos tin e documento cla pa firma, ainda nos tin cu bin cerca miembronan y si nan bisa no, ta e no ta bay,” segun sr. De Cuba. Hopi cos por pasa durante negociacion, por bin accionnan, por bisa pa para tur cos y ta manera sr. De Cuba a declara: “nos ta hole cu den salida nos ta bay pega.”Ya caba tin indicacion cu lo tin problema pa cuminsa e negociacionnan pasobra manera conoci, Aruba a conoce aumento di awa y coriente di mas cu 20%, y awor pa bay negocia na mesa pa un miho solucion pa miembronan y Elmar bin bisa cu no por duna nada aworakinan pasobra mester a aumenta tarifa pa ‘break even’ etc. Segun sindicato STA, si bo sa bo ta bay drenta un aña di negociacion, mester pone reserva un banda pa locual ta e CAO, e aumento di tarifa ta algo completamente separa den negociacion di CAO.

 

LEAVE A REPLY

Please enter your comment!
Please enter your name here