Cuba a registra por lo menos 3.157 detencion arbitrario na 2019, un cifra mas halto cu e aña anterior, segun informacion di Observatorio Cubano di Derecho Humano (OCDH).

“2019 tabata nefasto pa ehercicio di derecho humano na Cuba. E clase cu ta controla tur resorte di poder politico y economico ta keda sin duna espacio na ehercicio di derecho humano di parti di e ciudadanonan y ta reprimi cu diferente metodo cualkier expresion discrepante,” Alejandro Gonzalez Raga, director ehecutivo di e organisacion, a declara.

E organisacion a duna detaye di detencion cu tabata tuma lugar riba caminda publico sin orden hudicial, acompaña pa invasion di vivienda, multa, confiscacion di bienes priva, sota, menasa y retencion ilegal. E principal victimanan tabata e activistanan di derecho humano y periodistanan independiente.

OCDH a alerta cu na 2019 e regimen Cubano a aumenta e practica di ‘retencion domiciliario’ contra activistanan pacifico, cu nan tabata impedi di haci uso di nan derecho di movecion, reunion y manifestacion liber. “E forma aki, cu no ta nada nobo, ta ser aplica mas frecuente como forma represivo contra oposicion,” e nota di e organisacion ta bisa.

E luna mas represivo tabata september, unda a registra 481 detencion coincidiendo cu e anuncio di presidente Miguel Diaz-Canel di e yegada di un ‘periodo coyuntural’, un eufemismo pa referi na e crisis economico di e pais. E di dos luna mas represivo tabata februari, cu 405 detencion, na momento cu tabata tene e referendum constitucional. Na e ocasion ey e regimen di e isla a usa tur metodo di represion contra e promotornan di “No” y di abstencion contra e constitucion nobo.

LEAVE A REPLY

Please enter your comment!
Please enter your name here