(CiberCuba) – Gobierno Cubano ta trata di promove turismo di naturaleza pa atrae nas bishitante di exterior, den un crisis economico den cual turismo te awor no a recupera na e nivel di antes. Plannan nacional no ta cumpli y entrada di gobierno ta kedando atras.

Manuel Marrero Cruz, promer ministro Cubano, a lamenta durante e evento TURNAT 2022, na Habana, cu ta promociona e isla solamente como un destino di solo y playa, mientras tin otro atractivo manera salud, deporte y gastronomia. Marrero a destaca cu e turista cu ta yega Cuba ta busca destino politico y historico, mas tanto e hoben, aunke e no a specifica cifra ni nacionalidad.

“Nos ta bay cu bon paso, dirigi na duna di conoce e potencialidadnan di e isla, siñando pa ubica na e lugar mereci tur e tesoro cultural, historico y natural,” e mandatario Cubano a expresa, segun un reporte di e corant Tribuna de La Habana.

Di acuerdo cu datonan oficial, ultimo tempo turismo di recorido via diferente ruta a mira un incremento di demanda, dunando e bishitante un vision mas completo di e pais. Entre e lugarnan patrimonial y cultural preferi tin e asina yama “siete villas fundacionales de Cuba”: e siete ciudadnan funda na inicio di e colonia den promer decadanan di siglo 16.

Cuba tin un plan di 2,5 miyon turista pa 2022, cifra na cual no ta yegando, a causa di e situacion internacional actual (inflacion, recesion, guera na Ucrania, etc.), motibo pa cual algun economista ta considera disparate cu gobierno ta purba mantene un meta cu nan no por cumpli. Te juli 2022 a yega Cuba 1.200.580 biahero, di cual 834.891 tabata bishitante, segun datonan di Oficina Nacional di Estadistica y Informacion (ONEI). Esaki ta solamente 19.5 % di e bishitantenan cu a yega Cuba na 2019, e mihor aña pre-pandemia.

LEAVE A REPLY

Please enter your comment!
Please enter your name here