20Aug EdM comandante (4).JPG

Prome cu su despedida di Aruba pa sigui cu su siguiente funcion den Marina Real, Cuerpo Policial a invita Comandante di Marinierskazerne Savaneta, Jan ten Hove, pa un reunion cu Altocomisario mr. Adolfo “Dolfi” Richardson a gradici e comandante pa su colaboracion y contribucion.

E comandante a ricibi un invitacion pa un reunion di Korps Management Team (KMT) y aki Altocomisario Richardson y coleganan di Cuerpo Policial a sorprende cu algun recuerdo di e tempo cu nan a traha hunto y a expresa palabranan di aprecio pa e bon cooperacion.

E relacion di trabao entre e Comandante y e Altocomisario tabata hopi bon y Richardson a comenta cu Ten Hove ta un persona cu tabatin curason pa e comunidad di Aruba, cu ta un di su caracteristicanan cu Cuerpo Policial ta aprecia masha hopi. “Cuerpo Policial lo bay sinti su falta hopi”, asina Richardson a remarca, añadiendo cu el a papia durante di e reunion cu e Comandante nobo y a expresa cu Cuerpo Policial ta spera di por conta cu e mesun cooperacion bao di su maneho tambe.
 

Marina Real ta un partner strategico pa Cuerpo Policial di Aruba, cu kende kier sigui fortifica e relacion, e hefe di polis a agrega. Di su parti, Jan ten Hove a laga sa cu ora el a yega Aruba tres aña pasa el a cuminsa establece y amplia e contactonan cu diferente partner manera Warda Costa, cual ta basa den e kazerne y Cuerpo Policial.

Tabatin un acercamento tambe cu unidadnan specifico di Cuerpo Policial, manera K9, Unidad Mobil, pero tambe prizon KIA. El a splica cu e tabata kier un bon relacion cu tur servicio cu ta traha den cuadro di stabilidad y siguridad na y pa Aruba. Esaki tabatin su resultado tambe, cual a keda confirma pa e gesto di Cuerpo Policial y e forma cu a expresa con hopi nan a aprecia su maneho cu tabata hopi mas dirigi riba Aruba.

Comandante Ten Hove a conclui bisando cu pe tabata logico cu mester fomenta un bon relacion cu Aruba, pasobra Marina Real no ta na Aruba pa nan mes, pero pa Aruba y p’esey tambe el a busca pa haci kico cu Marina por haci pa contribui na un Aruba mas stabiel y sigur.