ORANJESTAD – Ayera na Renaissance Convention Center a celebra e ‘Cumbre di Maneho di Plan Educacional 2030’ dirigi pa docentenan di scol. Di mesun manera minister di Enseñansa, Armando Rudy Lampe, kende tabata presente den e acto aki, a duna reconocemento di e ‘Appel di Oro’ pa e miho maestro di aña.

Lampe a splica cu e presentacion di e Plan Educacional 2030 ta consisti di un maneho pa e proximo 10 aña, unda cu e ta un vision mas a largo plaso, pa motibo cu den enseñansa e persona ta mira e frutonan despues di hopi tempo.

E plan ta coresponde cu e revolucion di mundial na e momentonan aki, cu ta un revolucion digital, esey ta cambia tur cos den bida y sociedad, e parti di enseñansa no por keda mes cos.

Na nivel local, Lampe a expresa cu e gran cambio tambe ta e cambio di introduccion pa duna Papiamento su luga mereci den enseñansa.

E Plan Educacional ta wordo lansa den aña 2019, pa motibo cu e aña aki ta e ‘Aña di Famia y Cuido di Mucha’. E cuido di mucha, segun Lampe, ta un topico central, e interes di e mucha tur cos ta bay cay rond di nan y na augustus lo bay implementa e Scol Arubano Multilingual (SAN).

E cambio, manera Lampe a sigura, cu e mucha ta central den enseñansa y den e era digital, y e cambio ta haya su luga mereci e aña aki. Tambe a splica cu for di awor te cu aña 2030, nan lo bay fiha metanan, mescos cu Unesco y Nacionnan Uni, di loke ta trata desaroyo sostenibel te aña 2030.

Un di e metanan ta cu henter mundo kier mira cu calidad di enseñansa ta wordo logra pa 2030,. E calidad di enseñansa, segun UNESCO, tin di haber cu e mucha ta central, e hoben studiante ta e centro, nan ta suheto di e proceso di educacion. Tambe tin e parti di idioma materno.

Lampe a comenta cu na Aruba, Papiamento ta e idioma oficial y esey ta bay bira tambe e fundeshi di e scol Arubano multilingual. Cu esey, Lampe a bisa cu nan kier logra ta den sintonia cu loke Nacionnan Uni ta pidi. “E caso aki ta un exigencia internacional, y awor nos lo kier hiba nos enseñansa na un nivel internacional”, el a agrega.

El a afirma tambe cu e idioma Hulandes ta bay keda den e sistema di enseñansa como idioma stranhero. Te e momentonan aki, Hulandes tabata maneha cu tur e materialnan como si fuera otro idioma materno, pa motibo cu na Aruba ta uza e sistema Hulandes. Na Hulanda si ta e idioma materno, pero aki ta un idioma stranhero, mescos cu Spaño y Ingles, Lampe a sigura.

E cuater idioma ta bay keda presente den e sistema di enseñansa pa motiva cu e sistema di Aruba ta multilingual, e comunidad ta maneha cuater idioma den e bida diario y na scolnan tambe cuater idioma lo bay ta presente, solamente cu e base ta e idioma materno, Papiamento, Lampe a finalisa.

Di otro banda, e ganadonan di e Appel di Oro 2018 di e aña a resulta:

Maestro

Nicole Villada

Sint Franciscus College

Dirigente

Maritza Carrion

Scol Preparatorio Cacique Aterima

Lifetime Achievement Award

Reginald Altman

Filomena College MAVO

Proyecto

Nos Hofi

Scol Caiquetio