Dama cabey ranca karting ta keda sin ayudo

Cu herida en bes di su cabey na cabes, cual ta mas cu un aña habri sin cu e ta haya ayudo medico adecua, sin ayudo di e compania Bushiri Karting unda e accidente a tuma luga, awor pa Lissethe De La Hoz e awa a yena na hemchi. E ta busca su derecho pa asina forsa esunnan cu a lag’e pa asina tempo na caya.

 Na 2015  sra. De La Hoz a perde un parti hopi grandi di su cuero di cabe,  causa di un accident cu un go kart di e compania menciona ariba. Despues di casi 2 aña e caso ta bolbe haya atencion ora cu e dama a publica su storia, pidiendo ayudo riba Facebook.

E dama ta consciente di su condicion y a acepta cu e proceso pa e yega bek na un aparencia ‘normal’ lo ta un caminda largo. Su preocupacion no ta pa ricibi un cirugia cosmetico, sino pa yega na un cura di su herida cual tin mas cu un aña habri y ta treciendo un trauma den su bida.

Cabey pega den motor
22 di december 2015, durante su bishita na Bushiri Karting, e no a bay manera planea pa e dama. Mientras cu e tabata core, pa un motibo desconoci su cabey a los y pega den e motor di e vehiculo. Ta te despues cu a logra kita e helm di su cabes, a bin realisa cu un bon pida di su cuero a kita hunto cu e cabey. A preserva su cuero durante 4 luna – cual riba su mes probablemente ta no usual segun investigacion haci pa Bon Dia Aruba – prome cu a trata na conecta esaki bek.

32 biaha den sala di operacion
Despues di e accident, sra. De La Hoz a pasa den un cantidad di operacion y tratamento sin un resultado positivo. E dama ta conta cu e la bishita sala di operacion no menos cu 32 biaha. Den su palabranan, “Mi a pasa den e accident cu mi cuero dos biaha. Un na karting y e otro na hospital ora cu cada biaha nan mester a ranca e cuero bek sin anestesia ya cu cada biaha nan ta cambia e remedinan y esaki ta laga pida di e cuero muri.” E dama ta sigui splica cu p’e, specialistanan a perde control masha tempo caba di e situacion pero pa capricho no kier mand’e afo.

Bushiri Karting
E compania unda cu e accident a pasa a laba den un forma di bisa maske cu nan tambe ta carga un tipo di responsabilidad pa locual a pasa. E compania no tabata ofrece suficiente proteccion pa e consumidor na momento cu e accidente a pasa ni tabata tin borchinan presente cu ta adverti di peliger. Locual tabata notabel, cu un dia despues di e accident a laga pone borchinan di advertencia na e localidad. E unico cos cu a keda haci pa e compania ta cu a hiba un bouquet di flor y a ofrece e dama trabou; algun dia prome cu e accident e dama a termina su relacion di trabou. Segun e dama ta splica, e la wordo bisa for di e compania cu apenas nan ta cuminsando y no por haci hopi pe. Bon Dia Aruba a bay check registro di Camara di Comercio y tuma nota cu e compania ta existi desde 2010 pues no ta papiando di un compania nobo.

Fuera di esaki, ta surgi e pregunta di unda e seguro di e compania ta? Na momento cu bo ta ofrece un servicio cu ta trece peliger, ta mas cu obvio pa tin un seguro cu ta proteha e cliente. Ta conoci tambe cu ‘normalmente’ e procedura pa haya permiso tin como exigencia pa bo tin un seguro na ordo.

Bon dia Aruba lo ta tumando contacto cu e compania pa un splicacion di esaki y lo papia cu e departamentonan concerni tambe riba e aspecto aki.

AZV
Despues di e publicacion riba Facebook di parti di sra. De La Hoz, AZV a reacciona y busca contacto cu e pashent. Nan a sinta cu e dama y a splica cu nunca AZV a ricibi un peticion oficial pa mand’e  afo pa cuido medico. Durante e reunion nan a intercambia basta informacion di e caso y tambe di kico ta AZV su tarea den e situacion aki. E seguro nacional a splica e pashent cu maske e la wordo bisa hopi biaha pa e dokternan cu AZV no lo haci nada, e ta keda su derecho di acudi personalmente cerca nan y haci pregunta.

AZV ta splica cu nan no ta cubri cirugianan cosmetico ni tampoco tratamento cu ta wordo duna na Aruba mes. Tambe a bisa cu ta opta prome pa tratamento aki mes cu specialistanan local y despues ta bay over pa manda pa exterior. Pero e specialista of hospital mes mester haci e peticion. E opcion cu tin riba mesa awo pa e cliente aki ta un tratamento di ‘hyperbaric chamber’ cual ta disponibel na Corsou of Colombia. Te cu aworaki a manda pashentnan solamente pa e isla bisiña. Sra. De La Hoz a splica cu locual a pone awa pasa e hemchi ta cu ora e la bay busca e carta cerca specialista pa e bay afo. Despues di a wordo bisa pa bin busca esaki tal dia, e la wordo notifica cu e dokter ta cu vakantie y no a traha e carta. AZV a admiti cu e dokter a actua robes cu esaki y lo atende esaki.

Caso contra e compania
A puntra e vocero di AZV, Solange Tchong, pa kico AZV mes ta cubriendo mientras cu e compania unda a pasa e accidente tambe tin su responsabilidad. Sra. Tchong ta splica cu AZV normalmente ta cubri e gastonan aki paso kier trece alivio pa e ciudadano. E ta sigui splica cu nan no sa entama caso contra persona of compania pero ta evaluando pa evalua esaki den e caso specifico aki.

Di locual por a comprende di e dama ta cu e ta hopi disgusta con e la wordo trata pa un di e specialistanan. Desde inicio dos chirurg ta duna e tratamento pero ta un di nan so tabata cu ne 30 biaha den su 32 operacionnan. E dama ta splica cu e chirug cu no tabata presente, a bay asina leu di pensa di skirbi un buki di e caso sin pidi su permiso. Tambe tabata tin un ‘rancamento di ciboyo’ riba e tema di cua di dos chirug lo ‘claim’ e trabounan haci na AZV y cobra esaki.

E dama ta bisa tambe cu pe ta incomprendibel con ainda nan no por a dun’e su file mientras cu e ta pidiendo esaki pa algun tempo caba y e tin derecho riba dje pa sa kico a pasa cu ne.

Segun por a comprende, e pashent lo entrega un keho oficial na e departamento di inspeccion di salud. Cu e storia aki, tin hopi pregunta cu ta keda habri. Bon Dia Aruba lo sigui riba esaki y tambe purbando haya mas informacion di banda di e compania di karting y di e specialistanan.

You May Also Like

Re apertura y desvelo di ‘mural’ di tur Calypso y Roadmarch kings di pasado

ORANJESTAD – Conhuntamente cu representante di SMAC, Musica, San Nicolas Business Association, DOW y ...

3meil,SL, directiva.jpg

Directiva nobo pa Fundacion Hende Muhe den Dificultad

Fundacion Hende Muhe den Dificultad (FHMD) recientemente a scoge un directiva nobo. Despues di ...

WEB ta sigui garantisa cu awa di bebe ta di bon calidad

ORANJESTAD – A pesar cu ainda tin criticanan riba e calidad di awa potabel ...

web situacion financiero Br.JPG

WEB su ganashi ta entre 40 pa 50 miyon florin

Gerencia di WEB ta lamenta cu informacion riba e negociacion di e CAO ta ...

otmar salida gob.png

Ultimatum di minister Oduber ta mustra ‘done deal’

Minister Oduber a duna gabinete Mike Eman II su ultimatum ayera por medio di ...