Parlamentarionan di coalicion no mester ta extension di Gobierno

Seis luna despues di a bandona Parlamento, Daphne Lejuez no a mira ningun mehoracion den funcionamento. E ex-Parlamentario no ta sinta den e sala di Parlamento, pero ta keda mes enfoca riba kico ta sucede den Parlamento y ta keda hopi comunicativo cu su siguidornan pa medio di su pagina di Facebook. Es mas, kizas cu su experiencia di paden, e por compronde miho kico hopi ciudadano y votado ta observa y pakico.

“Despues di mas di 6 luna di a bandona Parlamento, lamentablemente mi mester constata cu nada no a realmente cambia. Ainda e coalicion cu ta sostene gobierno ta den ‘defense mode’ y ta defende maneho di gobierno door di bira personal y papia di tur cos menos e leynan of topiconan cu ta ser trata. Oposicion ta wordo bagatelisa y insulta pa coalicion. Hasta Ministernan ta insulta Parlamentarionan di oposicion y ta haya forsa pasobra nan sa cu tin un mayoria di 11 cu no lo cuestiona nan acto ni decisionnan,” ta locual Daphne Lejuez a bisa Bon Dia Aruba.

“Mientras riba papel y den nos Constitucion, un Parlamentario supuestamente mester ta imparcial y defende e interes di Pueblo, cuestionando y controlando e maneho di gobierno, e realidad ta cu Parlamentarionan ta mas preocupa cu defende nan partido cu e interes general. Esey tin como consecuencia cu ta crea e famoso ‘stempel parlement’ na unda cu e liña di e partido ta bay prome cu tur cos.”

Den otro palabra, pa Lejuez, nada a cambia y es mas, e ta preocupa cu e tendencia ta mustra cu el a bira pio. “Ningun Parlamentario di coalicion ta cuestiona Gobierno. Pues, nunca lo haya Parlamentario critico. Al contrario, ta haya Parlamentarionan cu en bes di cuestiona, ta defende maneho di Gobierno. Nan a bira un extension di Gobierno den Parlamento en bes di haci pregunta critico. Pero nan trabao ta mustra di ta critica oposicion durante reunionnan publico. E ta mustra atrobe cu den practica, Gobierno por keda conta cu ‘cheerleaders,’ cu ta e mayoria den Parlamento.”

Lejuez a cataloga e forma di funciona aki como un secuestro di e trabao di control di Parlamento. “E sistema democratico ta duna espacio pa tene Minister responsabel, pero na momento cu tin mayoria ta sostene Gobernacion, no por haci nada. Mas ainda, si un Presidente di Parlamento ta parti di e coalicion, e no por haci otro tampoco. Realidad ta cu dificil pa conta riba imparcialidad,” ta e pensamento di Lejuez.

LIM

E observacion aki ta mas interesante mirando cu awe Parlamento ta trata e Landsverordening Instelling Ministers nobo, LIM. For di momento cu Gabinete Wever Croes II a sinta, mayoria Minister tabata traha cu apoderacion. Lejuez tabata comenta na varios ocasion cu e Ministernan cu den e periodo tras di lomba, cu e mandatario presente no ta esun cu ta carga e responsabilidad.

“Ta di lamenta cu a crea un situacion yen di confusion na unda ni e Parlamentarionan tabata sa ken realmente tabata responsabel pa cua cartera y pa responsabilisa su mes formalmente na Parlamento. Esaki, mientras en berdad por usa ‘machtiging’, esta e apoderacion pa otorga ehecucion na un otro Minister, semper esun oficialmente apunta ta keda responsabel na Parlamento. E apoderacion como tal no ta para riba un nombramento oficial. Pues a crea hopi confusion, y mas aun ora esnan apodera a cuminsa usa titulonan y Ministerionan cu no ta existi oficialmente ainda. Asina nos ta wak un supuesto Minister di Naturalesa bin duna cuenta pa medio ambiente, RWZI y Parkietenbos na Parlamento sin cu e ta autorisa pa haci esaki formalmente, ya cu e ta oficialmente Minister di Transporte, Telecomunicacion y Sector Primario. Pues e ora oficialmente Parlamento lo no por dun’e un mocion of instruccion pasobra e no ta e Minister oficialmente encarga. Esaki ta crea confusion pa Parlamento, pero tambe pa pueblo, sigur si ningun di e apoderacionnan aki a keda publica pa sa exactamente ken ta responsabel pa kico.”

Transparencia y Integridad

Gabinete Wever Croes II y Presidente di Parlamento mr. Edgard Croes a priminti integridad y transparencia. Pero segun Lejuez, e solo hecho con a yega na e reparticion a laga hopi pregunta.

E argumento di Minister Arends ta pasobra nan ta traha ‘horizontal,’ cruzando Ministerionan. “Kizas Minister Arends no ta compronde entre otro bestuursrecht ni nos Staatsregeling cu ta defini cu cada Minister ta responsabel pa su cartera, asina yama ‘Ministeriele Verantwoordelijkheid,’ esta responsabilidad Ministerial. Pues traha ‘horizontaal’ no ta existi, ya cu cada Minister ta individualmente responsabel pa e cartera cu e la keda encarga cune segun e LIM. Claro cu tur Minister mester traha hunto y colabora pa logra e programa di Gobernacion, pero cada un mester coordina esaki for di nan cartera y no por mete den esun di otro.”

Consecuentemente e forma di traha aki no a trece hopi confianza cerca Daphne Lejuez, cu berdad ta tuma e promesa di transparencia y integridad na serio. “Transparencia y integridad ta palabranan cu ta usa hopi sin realmente duna esakinan contenido. Tin hopi conflicto di interes y tambe actonan cuestionabel pa cual na hopi otro pais Ministernan lo a tene honor na nan mes y retira. Ehempel ta e vacuna-gate [red. Minsiter di Salud Dangui Oduber a ricibi hopi pregunta riba e tema aki, esta di e benta di certificacion di como 3000 vacuna. E Minister mes no a contesta. Tabata Prome Minister Evelyn Wever Croes den su calidad di e persona na cabez di e Crisis Team a dicidi pa contesta y bisa cu ta lamenta cu e caso a sucede, pero cu ta algo cu varios otro pais tambe a experiencia y cu a pasa e investigacion den man di Ministerio Publico].”

Den concepto di Lejuez, transparencia ta di suma importancia pa Parlamento, pueblo y tambe pa prensa por haci su trabao di controla e maneho. “Mester tin transparencia pa sa si e maneho ta husto y cu en berdad ta cumpli cu reglanan di bon gobernacion. Asina aki tambe por constata si di berdad ta actua cu integridad of solamente ta keda na palabra. Un ley cu por ehempel lo por yuda hopi den esaki ta e ley di archivo (Archiefwet) cu ta regla con mester warda documentonan, publica y tambe registra, asina por crea mas transparencia y eherce mihor control.”

Fundacion Lotto pa Deporte

Ayera tabatin inicio di e caso cu Minister Endy Croes a entama contra Ernst & Young pa un investigacion mara na su persona. Na 2019, Corte Supremo, Hoge Raad a bisa cu e compania no a anda cu cautela den e investigacion riba sr. Croes, cu tabata Director di Fundacion Lotto pa Deporte. E caso aki ta diferente cu e caso penal cu Ministerio Publico a entama contra sr. Croes.

E caso nunca a bin dilanti pa motibo cu Ministerio Publico a haci un eror tecnico den e asina yama ‘oproeping’ y Huez a declara e ‘dagvaarding’ inadmisibel. Huez e tempo a bisa Ministerio Publico pa traha un dagvaarding nobo, pero esey nunca a sucede. E Fiscal encarga cu e caso no a termina e trabao y a bolbe Hulanda mesora. Den otro palabra, e caso nunca a bay dilanti.

Di otro banda, sr. Endy Croes ta considera cu e decision di Hoge Raad cu a bisa cu e investigacion di Ernst & Young no tabata haci cu e debido cautela ta motibo pa e demanda rectificacion, y a bisa Bon Dia Aruba na momento di a huramenta como Minister, cu esey no ta strob’e hay’e cargo di Fundacion Lotto pa Deporte.

Pero Daphne Lejuez ta mira e desaroyo aki diferente. “Pa loke ta e caso di Minister di Enseñansa, cu ainda no ta oficialmente Minister di Deporte te ora cu e LIM cambia, ta preocupante cu den e propuesta di e LIM nobo kier haci sr. Croes e Minister di deporte, bao ken Fundacion Lotto pa Deporte lo resorta. Tin e caso penal (red.cu no a keda resolvi pa un huez) y ainda tin un caso a titulo personal andando contra e fundacion.

Esaki ta un di varios ehempel unda ta cuestiona e palabra tanto usa di ‘integridad.’ Particularmente a crea un cartera di Integridad, pero no kier cuminsa cu e casonan obvio aki y ta purba na hustifica pakico nan no ta un problema.”

Segun Daphne Lejuez, integridad ta encera apariencia tambe. Si berdad kier pone integridad halto, mester evita hasta e apariencia di conflicto di interes. “Pues e ta bisa hopi di nos representantenan y gobernantenan con nan ta anda cu e tema aki y mas aun di nos actual y futuro Minister di Integridad,” ta e opinion di Daphne Lejuez.

Potret di archivo.