Diamars ultimo, minister di Enseñansa Endy Croes a tene un programa informativo na unda el a presenta e Maneho di Enseñansa 2021-2025, cu e metanan pa cumpli pa asina ofrece un enseñansa di calidad.

Croes a menciona cu despues di reuni cu diferente instancia y stakeholders den veld di enseñansa, a bin dilanti cu no tabatin suficiente participacion den formulacion di un vision, di metanan, di maneho y di enseñansa, despues documentonan ta ilustra cu si a haci esey, pero kisas no tabata na conocemento di tur. Croes a mustra varios estudio cu a haci hasta aña pasa 2021.

El a trece dilanti e presupuesto, unda cu a refleha e grafico di minister di Finanzas, Xiomara Maduro, cu ta indica cu entrada ta presupuesta pa 1.275 miyon florin pa aña 2022 y un necesidad financiero di 1.651 miyon florin pa cubri e aña aki.

Pa loke ta trata presupuesto pa enseñansa, Croes a informa cu ta un total di 280.415,100 florin cu mester inverti den su totalidad. Di e suma aki, mas cu 80% ta bay na entre otro, na salario di docente y maestronan, cu ta un porcentahe hopi grandi.

Croes a expresa cu den su rol como minister, e no ta un experto tecnico den mundo di educacion.

Pero e ta considera importante pa nan scucha, trece stakeholders hunto, crea plataforma pa dialoga y trece balans den diferente interesnan.

Segun Acuerdo di Gobernacion 2021-2025, el a bisa cu lo trece innovacion den sistema di enseñansa pa asina prepara alumno y studiantenan pa por participa y contribui na pais Aruba.

E punto di salida ta e rapport produci na maart di 2019, Plan Educacion Nacional “PEN 2030”. siguiendo e meta number 4 di Sustainable Development Goals cu ta trata di Educacion di Calidad y tambe Landspakket, di e manera con ayudo financiero di Hulanda ta contribuyendo na esaki.

Ademas el a presenta e prioridadnan 2021-2025, unda e prome ta calidad basico di enseñansa. Eesaki tin e meta cu tur scol ta yega na calidad basico di enseñansa cu condicionnan cu mester t’ey, manera registracion di data, modernisacion di leynan, structura di subsidio, profesionalisacion y liderazgo fuerte, comunicacion y colaboracion, supervision. Ta bay percura pa tur tipo di enseñansa ta acopla na otro y cu mercado laboral, pa yega na calidad basico ta optimalisa, y ademas pa cumpli cu e demanda minimo: Onderwijsprocess, examinering en diplomering, schoolklimaat, onderwijsresultaren,kwliteitzorg, pedagogish didactish handelen van leraren, financielbeheer, cu entro otro ta aspectonan cu ta bay acopla cu e maneho cu kier brinda.

E meta pa loke ta trata enseñansa pa un y tur (inclusion y lifelong learning) y desaroyo di competencianan di siglo 21, Croes a sigura cu tin cu percura pa e posibilidadnan di siña ta amplio, unda cu comunidad mester tin acceso na enseñansa y tin cu wordo adopta na lifelong learning – pa cu e SDG’s number 4 menciona caba.

Tambe el a bisa cu mester tin condicionnan basico pa digitalisacion di enseñansa. Durante pandemia di Covid-19 a prepara un plan di contingencia, unda cu ta conoci cu Aruba no ta completamente prepara pa bay den enseñansa digital. Croes a opina di esaki cu Aruba ta den rumbo di digitalisacion manera cu mundo ta bayendo, pero mester bay di un manera structura, poniendo prioridadnan pa por cubri e parti aki. Ademas, structura di cuido mester ta fuerte como eerstelijn den zorg.

E ultimo prioridad cu ta papia di desaroyo competencia siglo 21, tin di haci cu curiculo relevante y actual, maneho di idioma integral, prepara alumnonan pa competencia pa mercado laboral, pa nan sigui studia, desaroyo persona y duna aporte na un miho sociedad hunto cu 4C cu ta Comunication, Collaboration, Critical Thinking y Creativity.

Na e momentonan aki, Croes a señala cu enseñansa ta para, caminda cu tin un protocol cu a firma dia 13 di november 2020 (Onderlinge regeling), cual ta papia di e Landspakket cu ta para pa reforma y inversion, percurando pa haci economia y sociedad di Aruba resiliente y sostenibel den futuro.

Den e protocol aki tin 8 reforma total den area di maneho financiero, costo y efectividad di sector publico, reforma di sistema di impuesto, sector financiero, economia, salubridad, enseñansa y reforsa derecho di estado.

Cu esaki, Croes a informa cu trabounan a cuminsa na luna di april 2021 cu e doorlichting, na juni y september di e mesun aña pasa Inspectie Hulanda tabata na Aruba pa pasa door di e proceso aki. E enfoke primordial, segun el a sigura, di e doorlichting aki ta: 1- Het realiseren van een basiskwaliteit van onderwijs, 2- Het realiseren van een goede aansluiting tussen onderwijs en arbeidsmarkt y 3- Het realiseren van goede doorstroom tussen stelsels van onderwijs. [Realisacion di calidad basico di enseñansa, realisacion di bon acoplamento entre enseñansa y mercado laboral, y realisacion di bon fluho entre sistemanan di educacion.]

Esaki ta forma parti di e maneho cu e ta bin splicando, unda cu Aruba no por bira lomba cu e Landspakket, e tussenrapport y doorlinchting cu a tuma luga. Como minister di Enseñansa el a sigura cu el a reacciona riba e rapport y cu ayera e mester bay na Parlamento di Aruba y awe ta bay presenta di manera mas profundo den un conferencia di prensa, pa despues e bira publico riba e website di Gobierno di Aruba cu e palabracionnan entre Aruba y Hulanda.

Di esaki, el a menciona cu e rapport a produci 13 recomendacion tocante con nan a haya enseñansa di Aruba, kico nan ta bay haci pa Aruba por eleva y mehora unda cu na luna di april di e aña aki lo keda conoci e rapport final.